Քաղաքականություն
02.10.2019 | 16:45Մարդիկ, ովքեր ունեն պետության կողմից երաշխավորված բուժօգնության կարիք, կստանան բուժօգնություն՝ անկախ այդ կառույցների պետական կամ մասնավոր լինելուց: Ազգային ժողովի նիստին այս մասին հայտարարեց առողջապահության նախարարի տեղակալ Հովհաննես Հարությունյանը՝ անդրադառնալով Մաշկաբանության և սեռավարակաբանության բժշկագիտական կենտրոնը պետգույքի մասնավորեցման ցանկից հանելու մասին հարցին:
Փոխնախարարն ասաց՝ պատգամավորների կողմից հնչեցված հարցերը, որոնք վերաբերում են ԲԿ-ի տարածքում եղած հողատարածքի գնին և ԲԿ-ի գույքին, պետք է ուղղել Պետական գույքի կառավարման կոմիտեին:
«Այդ գույքը ներկայումս պետական գույքի կառավարման ներքո է գտնվում: Դրա համար էլ համարում ենք, որ մինչև այս նախագիծը շրջանառել սկսելը՝ պետք էր պետական գույքի կոմիտեի հետ շփվել ու հասկանալ՝ արդյո՞ք հողի գնի և մրցույթների պայմանների մասով բոլոր գնահատականները բավարարո՞ւմ են մտահոգություն արտահայտած մեր գործընկերներին, թե՞ չէ»,- ասաց փոխնախարարը:
Հովհաննես Հարությունյանի դիտարկումը դուր չեկավ ԱԺ նախագահին: Արձագանքելով նրա ելույթին՝ Արարատ Միրզոյանը հորդորեց այլևս Ազգային ժողովին «իր տեղը ցույց չտալ»:
«Հասկանում եմ, որ նախարարի տեղակալը վաղուց արդեն քաղաքական, ոչ թե հայեցողական կամ մասնագիտական պատրաստվածություն պահանջող պաշտոն է, այնուամենայնիվ, կառաջարկեի այսուհետ քիչ փորձել Ազգային ժողովին իր տեղը ցույց տալ կամ աշխատանք սովորեցնել: Թող գործադիրն իր աշխատանքն անի, ԱԺ-ն կպատկերացնի՝ ոնց ինքն աշխատի», – ասաց Միրզոյանը:
Մանրամասները՝ տեսանյութում:
