«Պարո՛ն Գորգիսյան, վստահ եք խոսում սպա ծեծող մարզպետների մասին, հույս ունեմ՝ նախաքննությանը կօգնեք». Արարատ Միրզոյան. ՏԵՍԱՆՅՈՒԹ

Մարզպետներն առաջարկություն են ներկայացնում համայնքային բյուջեների վերաբերյալ, միջամտում են հանրակարթական ոլորտին: Սրանք լծակներ են, որոնք մարզպետը կիրառում է համայնքապետերի նկատմամաբ: Այս մասին ԱԺ-ում Տարածքային կառավարման մասին ՀՀ օրենքի նախագծի քննարկման ժամանակ ասաց «Լուսավոր Հայաստան» խմբակցության պատգամավոր Գևորգ Գորգիսյանը:

Նախագծի շրջանակում քննարկվում է մարզպետների լիազորությունների փոփոխության հարցը:

«Այս լծակներով մարզպետներն ասում են՝ սիրելի՛ համայնքապետ, դու կանես այնպես, ինչպես ես եմ ասում, թե չէ քո համայնքի ճանապարհի վերանորոգման համար առաջարկ չեմ ներկայացնի, կա՛մ միջոցառումը կբերեմ քո գյուղ, կա՛մ կտանեմ կողքի գյուղ: Այս ամենը լծակներ են, որոնք միշտ օգտագործվել են և շարունակելու են օգտագործվել, իսկ մարզպետը, որպես վերադաս, խոսում է ընտրովի մարմնի հետ: Մենք ունենք մարզպետներ, որ խառնվում են ընտրություններին, հայտարարում են, որ գյուղապետին աշխատանքից են հեռացնելու, սպայի են ծեծում: Այս նախագիծն ի՞նչ է փոխում»,- ասաց պատգամավորը:

ԱԺ նախագահ Արարատ Միրզոյանը նկատեց՝ Գևորգ Գորգիսյանը շատ վստահ է խոսում սպային ծեծած մարզպետի մասին:

«Ես կարծում եմ, որ շատ կոնկրետ ինֆորմացիա չունենաք, վստահորեն այդպիսի պնդում չէիք անի: Հույս ունեմ՝ նախաքննական մարմիններին և հետո դատարանին Ձեր ցուցմունքներով կօգնեք արդար քննությանը»,- նշեց ԱԺ նախագահը:

Մանրամասները՝ տեսանյութում:

Նարեկ Կիրակոսյան