02.07.2026 | 06:06
ԱԱ-2026. ԱՄՆ-ի հավաքականը շարժվում է առաջ. ՏԵՍԱՆՅՈՒԹ
ԵՊՀ-ն պետք է դառնա ՀՀ բոլոր կառավարությունների ամենակարևոր փորձագիտական հենարանը. Նիկոլ Փաշինյանի ելույթը բուհի 100-ամյակի միջոցառմանը
Հասարակություն
27.09.2019 | 19:05
ԵՊՀ-ն ինչպես եղել, այնպես էլ պետք է շարունակի մնալ Հայաստանում մտքի, գաղափարների գեներացման հիմնական տեղն ու հարթակը: Մայր բուհի 100-ամյակի առիթով կազմակերպված միջոցառմանն ունեցած ելույթում ասել է ՀՀ վարչապետ Նիկոլ Փաշինյանը:
«Ուզում եմ հավատալ՝ նոր ժամանակները կլինեն ԵՊՀ-ի վերածննդի ժամանակներ, որովհետև ԵՊՀ-ն ինչպես եղել, այնպես էլ պետք է շարունակի մնալ ՀՀ-ում մտքի, գաղափարների գեներացման հիմնական տեղն ու հարթակը, որովհետև նոր ժամանակներում ազատությունը, ստեղծագործականությունը, արդարությունը, մտքի զարգացումը նույնքան պահանջված են, ինչքան պահանջված էին մեր ժողովրդի՝ 20-րդ դարի կյանքի ընթացքում»,- նշել է վարչապետը:
Նիկոլ Փաշինյանը մաղթել է, որ համատեղ աշխատանքի միջոցով հնարավոր լինի վերականգնել ԵՊՀ-ի երբեմնի փառքն ու մեծությունը:
«Սա պետք է արտահայտվի կոնկրետ արդյունքներով: Ես ասել եմ, և էլի ուզում եմ կրկնել, որ ինչպես բուհական համակարգն ընդհանրապես և ԵՊՀ-ն՝ մասնավորապես, պետք է դառնա Հայաստանի բոլոր կառավարությունների ամենակարևոր փորձագիտական հենարանը: Ուզում եմ ձևակերպել ԵՊՀ-ի միջազգայնացման խնդիր, որը պիտի դառնա այնպիսի մի բուհ, որն աշխարհին ունի առաջարկելու շատ բան և բաց է աշխարհից վերցնել նորարական գաղափարներ և այդ գաղափարների վրա հիմնվելով՝ ապահովել կրթական համակարգի հետագա զարգացումը»,- ասել է նա:
Նիկոլ Փաշինյանը կարծում է, որ ԵՊՀ-ն առաջիկա 10 տարիների ընթացքում պետք է տեղ գտնի աշխարհի ուժեղագույն համալսարանների վարկանիշային աղյուսակի առաջին 500 հորիզոնականում. «Եվ սա մի խնդիր է, որի լուծման համար բոլորս պետք է մեկտեղենք, համատեղենք մեր ուժերը, և ԵՊՀ-ն վերստին դարձնենք մտքի, գաղափարների, ստեղծագործականության առաջատար ուժ»:
Մանրամասները՝ տեսանյութում:
