15.10.2026 | 10:19
Բողոքի ակցիա Կառավարության շենքի դիմաց՝ COP17-ի նախաշեմին. ՈՒՂԻՂ
Քիքբոքսինգի հայ մարզիկները աշխարհի գավաթի խաղարկությանը նվաճել են երկու ոսկե, յոթ արծաթե ու երեք բրոնզե մեդալ
27.09.2017 | 19:19
Քիքբոքսինգի Հայաստանի հավաքականները սեպտեմբերի 19-25-ը Ռուսաստանի Անապա քաղաքում մասնակցել են աշխարհի գավաթի խաղարկությանը: Հայ մարզիկները նվաճել են երկու ոսկե, յոթ արծաթե ու երեք բրոնզե մեդալ: Այսօր ՀՀ սպորտի եւ երիտասարդության հարցերի նախարար, ՀԱՕԿ-ի գլխավոր քարտուղար Հրաչյա Ռոստոմյանն ընդունեց աշխարհի գավաթի խաղարկության մասնակիցներին, մարզիչներին ու ֆեդերացիայի նախագահ Գառնիկ Հայրապետյանին: Հրաչյա Ռոստոմյանը շնորհավորեց մարզիկներին եւ հայտարարեց, որ մոտ օրերս քիքբոքսինգի ֆեդերացիան կընդգրկվի ՀՀ սպորտի եւ երիտասարդության հարցերի նախարարության հետ համագործակցող ֆեդերացիաների ցանկում. «Քիքբոքսինգի ֆեդերացիան Հայաստանում ամենակարգապահներից է: Պաշտոնական կարգավիճակը մի շարք առավելություններ կտա ֆեդերացիային, կկարողանաք սպորտի վարպետի կոչումներ ստանալ եւ այլն: Հարգելի մարզիկներ, վստահ եմ, որ հաջորդ տարվանից էլ ավելի համախմբված ու բարձր ոգով կմասնակցեք միջազգային մրցաշարերին: Մեր գլխավոր նպատակն է՝ Հայաստանում համատեղել կոնտակտային մարտարվեստները եւ ստեղծել միասնական հանրապետական առաջնություն: Շատ կարեւոր է, որ քիքբոքսինգի ֆեդերացիայի կարգ ու կանոնը վարակիչ լինի մեր մյուս մարզաձեւերի ֆեդերացիաների համար»,- ասաց Հրաչյա Ռոստոմյանը: Հայաստանի քիքբոքսինգի ֆեդերացիայի նախագահը, ի նշան շնորհակալության, գավաթ հանձնեց նախարար Հրաչյա Ռոստոմյանին:
