14.01.2026 | 15:57
Իրանի գլխավոր դատավորը չի բացառել արագացված դատավարությունները և ձերբակալված ցուցարարների զանգվածային մահապատիժները
Ադրբեջանում ընդդիմադիր ուժերը մեծ հանրահավաքի են նախապատրաստվում
Քաղաքականություն
19.09.2019 | 20:45
Ադրբեջանի ընդդիմադիր «Դեմոկրատական ուժերի ազգային խորհուրդը» պատրաստվում է սեպտեմբերի 28-ին մեծ հանրահավաք անցկացնել մայրաքաղաքում։ Ադրբեջանական ոչ իշխանամետ լրատվամիջոցների տեղեկություններով՝ ընդդիմադիրները դիմել են Բաքվի քաղաքապետարանին՝ հանրահավաք անցկացնելու արտոնություն ստանալու համար։
Հավաքի ընթացքում բարձրացվելու են մի շարք հարցեր, որոնք առնչվելու են Ադրբեջանի ինչպես արտաքին, այնպես էլ ներքին օրակարգին: Ցույցն անցկացվելու է ժողովրդավարական ընտրությունների անցկացման համար նորմալ պայմաններ ստեղծելու, Ղարաբաղյան հիմնախնդիրը լուծելու, քաղբանտարկյալներին ազատ արձակելու, երեխաների նպաստները վերականգնելու, բժշկական ապահովագրության համակարգ ներդրնելու, բնական գազի և էլեկտրաէներգիայի օգտագործման սահմափակումը չեղարկելու պահանջներով։
Դեռևս պարզ չէ՝ արդյո՞ք ընդդիմությունը կգնա ոչ արտոնված հավաքի, եթե քաղաքապետարանը մերժի հանրահավաք անցկացնելու հայտը: Նշենք, որ այս տարի հունվարի 19-ին տեղի ունեցած հավաքից հետո Բաքվի քաղաքային իշխանություններն ընդդիմության ոչ մի հավաք չեն արտոնել։
Հավելենք նաև, 2013 թվականին ստեղծված «Դեմոկրատական ուժերի ազգային խորհրդի» կազմում ներառված են «Ազգային ճակատ» կուսակցությունը, մի շարք հասարակական ու ոչ կառավարական կազմակերպությունների անդամներ, մտավորականության ներկայացուցիչներ։
Էմմա Չոբանյան
