Ես ներողություն եմ խնդրում ձեզանից, որ ձեր հարցը մինչև հիմա լուծված չէ․ Նիկոլ Փաշինյանը՝ զոհված զինվորների մայրերին. ՏԵՍԱՆՅՈՒԹ

ՀՀ վարչապետ Նիկոլ Փաշինյանն այսօր հանդիպեց կառավարության առջև առավոտից բողոքի ակցիա իրականացնող` զոհված զինծառայողների ծնողների և հարազատների հետ․ «Երբ ես 2018 թվականին դարձա վարչապետ, Հայաստանի զինծառայողների պաշտպանության հիմնադրամը վճարում էր 2017 թվականի հունվարի 1-ից հետո մարտական հերթապահության ժամանակ զոհված զինծառայողների համար։ Առաջին որոշումներից մեկը, որ մենք կայացրինք, այդ հիմնադրամի գործունեության ժամկետը 3 տարով հետ տարանք, 2014 թվականից սկսած դեպքերի համար սկսվեց վճարվել։ Այս որոշումը անցյալ տարվա օգոստոսին կայացրինք, և երբ սեպտեմբերի 21-ին Եռաբլուրում էի, սևազգեստ մայրերը մոտեցան, ասացին, որ խորապես վիրավորված են, ինձ ասացին՝ դուք մեզ վիրավորել եք, ասում են՝ «1000 դրամի» հիմնադրամը 3 տարով հետ եք տարել, բայց մեր երեխաները զոհվել են 2011 թվականին։ Ես ասացի՝ շատ հարգելի մայրեր, ձեր բոլորիդ առաջ խոնարհվում եմ, բայց այդ որոշման մեջ ոչ թե վիրավորանք պետք է տեսնեք, այլ քաջալերվեք, որ կառավարությունը այդպիսի քայլ է արել և այդ ուղղությամբ է գնում»,- դիմելով զոհվածների հարազատներին ասաց վարչապետ Նիկոլ Փաշինյանը։

Վարչապետն ընդգծեց՝ իրենց խնդիրը մինչև իննսունականներ հետ գնալն ու փոխհատուցում տրամադրելն է լինելու․ «Ես մի քանի անգամ հայտարարել եմ, որ մեր խնդիրն է, որ հիմնադրամը պետք է հետ գնա մինչև 1990–ականներ, բայց դրա համար պետք է աշխատեղերը գրանցվեն, և մարդիկ արձագանքել են, այս տարի 65 հազարից ավելի նոր գրանցված աշխատատեղեր ունենք։ 1000 դրամի հիմնադրամների վճարումներն էլ ավելանում են»։

Գործադիրի ղեկավարն ասաց՝ ամաչում է, որ դեռ այս հարցը լուծված չէ․ «Ես՝ որպես վարչապետ, ամաչում եմ, որ մենք այստեղ այսպիսի հարց ենք քննարկում, որովհետև այս հարցը պետք է վաղուց լուծված լիներ։ Ես ներողություն եմ խնդրում, որ այս հարցը լուծված չէ, բայց մենք 1 տարվա մեջ 9 տարվա հարց ենք լուծել»։

Մանրամասները՝ տեսանյութում։

Լիլիթ Շաբոյան