Ի՞նչ էին քննարկում Արփինե Հովհաննիսյանն ու Էլինար Վարդանյանը Վենետիկի հանձնաժողովի անդամների հետ հանդիպման ընթացքում

Քիչ առաջ երեւանյան հյուրանոցներից մեկի սրճարանում կայացել է ՀՀ Արդարադատության նախկին նախարար Արփինե Հովհաննիսյանի եւ նախկին ԲՀԿ-ական պատգամավոր Էլինար Վարդանյանի հանդիպումը Վենետիկի հանձնաժողովի չորս անդամների հետ։

Թե Ռոբերտ Քոչարյանի կալանքի գործով դատարանի կայացնելիք որոշումից մեկ օր առաջ, ինչպես նաեւ ՝ ԱԺ կողմից ՍԴ հետ կապված իրավիճակի շուրջ դիրքորոշում հայտնելու քաղաքական որոշումից անմիջապես հետո ինչ էին այսպես խորասուզված քննարկվում  Վենետիկի հանձնաժողովի անդամներն ու նախկին իշխանության ներկայացուցիչները՝ մեզ չհաջողվեց պարզել։

Փոխարենը պարզեցինք, որ Արփինե Հովհաննիսյանի եւ Էլինար Վարդանյանի հետ հանդիպած Վենետիկի հանձնաժողովի անդամներն են․ Մարտին Կուիջերը՝ Նիդերլանդներից ընտրված անդամ, Նիկոլաէ Էսանուն՝ Մոլդովայից ընտրված անդամ, Յոհան Հիրշֆելդը՝ Շվեդիայից ընտրված անդամ եւ Գրիգորի Դիկովը՝ Վենետիկի հանձնաժողովի քարտուղարության անդամ։

Հիշեցնենք, որ հուլիսի 18-ին Սահմանադրական դատարանը աշխատակարգային որոշում էր կայացրել «Երևան քաղաքի ընդհանուր իրավասության դատարանի և Ռոբերտ Քոչարյանի դիմումների հիման վրա՝ Հայաստանի Հանրապետության քրեական օրենսգրքի 300.1-րդ հոդվածի՝ Սահմանադրությանը համապատասխանության հարցը որոշելու վերաբերյալ» գործերի վարույթները կասեցնելու վերաբերյալ:

Այդ գործերով խորհրդատվական կարծիք ստանալու նպատակով Մարդու իրավունքների եվրոպական դատարանին և Վենետիկյան հանձնաժողովին դիմելու կապակցությամբ դատարանը որոշել էր մինչև պատասխաններ ստանալը կասեցնել վարույթները:

Օգոստոսի 20-ին ՍԴ նախագահ Հրայր Թովմասյանին հասցեագրված գրությամբ Վենետիկի հանձնաժողովի տնօրեն-քարտուղար Թոմաս Մարկերտը հայտնել էր, որ Եվրախորհրդի Վենետիկի հանձնաժողովը պատրաստ է խորհրդատվական կարծիք (amicus curiae opinion) տրամադրել Երևանի առաջին ատյանի ընդհանուր իրավասության դատարանի և Հայաստանի երկրորդ նախագահ Ռոբերտ Քոչարյանի դիմումների հիման վրա Սահմանադրական դատարանի կողմից քննության ընդունված գործերով:

Հավելենք, որ այսօր ավելի վաղ  Վենետիկի հանձնաժողովի անդամները հանդիպել են   քաղհասարակության մի խումբ ներկայացուցիչների հետ։

Նարեկ Կիրակոսյան