ՊԵԿ-ում Արթուր Վանեցյանի հոր հետ կապված քրեական գործը, հետաքրքիր է, հիմա ինչպե՞ս կընթանա․ Դանիել Իոաննիսյան

«Այն, որ ԱԱԾ տնօրենի գործելաոճը, մոտեցումները տարբերվում էին քաղաքական պրոցեսների տրամաբանությունից և ՀՀ-ում նախորդ տարի տեղի ունեցած հեղափոխության տրամաբանությունից, սա նորություն չէ և ընդհանուր առմամբ, զարմանալի բան չկա»,- անդրադառնալով ԱԱԾ տնօրենի հրաժարականին՝ Factor.am-ի հետ զրույցում ասաց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը։

Նրա խոսքով՝ կան որոշակի քրեական գործեր, որտեղ Վանեցյանն ունի անձնական հետաքրքրվածություն․ «Հիմա ուղղակի հետաքրքիր է, թե առանձին քրեական գործերը, որոնցում Վանեցյանն ուներ որոշակի հետաքրքրվածություն, ինչպե՞ս կընթանան։ Դրանցից են, օրինակ, Դավիթ Սանասարյանի գործը, ՊԵԿ-ում Արթուր Վանեցյանի հոր հետ կապված քրեական գործը և այլ գործեր կան, որտեղ զգացվում էր, որ նա ունի անձնական շահագրգռվածություն»։

Անդրադառնալով հարցին, թե Արթուր Վանեցյանի հրաժարականի տեքստում տեղ գտած ձևակերպումները՝ «առաջնայինը երկրորդականից, իսկ անցողիկը մնայունից չտարբերելու գործելաոճն այն ճանապարհը չէ, որը տանում է դեպի նպատակների իրականացում» և «իմ հրաժարականը թող լինի «Կանգ ա՛ռ»-ի սթափեցնող քայլ՛» արտահայտությունները արդյոք քննադատություն չե՞ն ուղղված վարչապետ Նիկոլ Փաշինյանին, Իոաննիսյանն ասաց․ «Իր միակ վերադասը Նիկոլ Փաշինյանն է, և ըստ էության, սա ակնհայտ է, որ ուղղված է Նիկոլ Փաշինյանին ու մի քիչ անհասկանալի է։ Այսինքն՝ Արթուր Վանեցյանը, որը ՀՀ ԱԱԾ Երևանի քաղաքային վարչության պետի տեղակալն էր ավելի լա՞վ է հասկանում ինչն էր առաջնային, ինչն էր երկրորդային, քան Նիկոլ Փաշինյա՞նը։ Ինքը լուրջ էդ կարծիքի՞ն է։ Չգիտեմ մի քիչ տարօրինակ է իր ինքնագնահատականը։ Սա չափազանց չեկիստական մոտեցում է, դա սովետական «Կագեբե»-ում էին համարում, որ իրենք են ամենախելոքը։ Սովետական «Կագեբե»-ի այդ մոտեցումը պետք է հանել ԱԱԾ-ից, և ես ուրախ եմ, որ դա սկսվեց Վանեցյանի հրաժարականով»,- եզրափակեց նա։

Լիլիթ Շաբոյան