27.09.2026 | 18:41
ՏԻՄ ընտրությունների մասնակցության արդյունքները ըստ համայնքների՝ 17։00-ի դրությամբ
Քաղաքացիներին հնարավորություն կտրվի տեսանկարահանել ճանապարհային երթևեկության խախտումները և օնլայն փոխանցել ոստիկանությանը․ 87 պատգամավոր 1-ին ընթերցմամբ կողմ քվեարկեց նախագծին․ ՏԵՍԱՆՅՈՒԹ
Քաղաքականություն
16.09.2019 | 12:32
Ազգային ժողովն այսօր առաջին ընթերցմամբ ընդունեց «Իմ քալը» խմբակցության պատգամավորներ Սիսակ Գաբրիելյանի և Արմեն Փամբուխչյանի հեղինակած՝ «Տեսանկարահանող կամ լուսանկարահանող սարքերով հայտնաբերված ճանապարհային երթևեկության կանոնների խախտումների վերաբերյալ գործերով իրականացվող վարչական վարույթի առանձնահատկությունների մասին» օրենքի նախագիծը։
Այս նախագծով քաղաքացիներին հնարավորություն կտրվի տեսանկարահանել ճանապարհային երթևեկության խախտումները և օնլայն ռեժիմով փոխանցել Ոստիկանությանը:
Նախագիծն ընդունվեց ձայների 87 կողմ, 21 դեմ, 1 ձեռնպահ հարաբերակցությամբ։
Հիշեցնենք, որ ուրբաթ օրն այս նախագիծը խորհրդարանում բուռն քննարկման տեղիք տվեց։ ԲՀԿ-ական պատգամավոր Արման Աբովյանը դեմ էր նախագծի ընդունմանը։
«Ի՞նչ ենք անում, առաջարկում եք՝ վազելով գնալ քաղմա՞ս կամ եթե հարևանը ժամը 8-ին քեֆ ա անում, զանգել գան՝ հավաքե՞ն։ Եթե դուք բերում եք կարգավորում, դուք քաղաքացու ձեռքը տալիս եք գործիք: Իսկ հիմա հարցնում եմ՝ ճանապարհների որակը բավարարո՞ւմ է, որ վարորդը առանց խախտումներ անելու քշի, իհարկե՛, ոչ, լուսավորությունը բավարարո՞ւմ է՝ ոչ։ Դե, եթե էդպես է, եկեք ասենք, որ Ոստիկանությունը ցրում ենք, սաղ մենք ենք անելու, պարո՛ն Խաչատրյան, զանգեք ձերոնց ասեք՝ էսօրվանից ցրվում են։ Այո՛, այս օրենքը հում է, այս օրենքը վատն է, մենք դեմ ենք»,- նշել էր Աբովյանը։
ԲՀԿ-ական Արթուր Գրիգորյանն էլ նշել էր․ «Ես զարմանում եմ, որ ասում են, թե էս նախագիծը լավն է, սա շատ վատ նախագիծ է։ Հիմա ինչո՞ւ ենք ընկել էս վարորդների հետևից։ Մի հատ բալային համակարգ ենք ներդնում, բացի բալ հանելը տուգանում ենք, հիմա էլ ասում ենք՝ վերցրեք հեռախոսներն ու ընկեք վարորդների հետևից»։
Մանրամասները՝ տեսանյութում։
