Ոչ թե կոպեկներ, այլ միլիոններ. շքեղ առանձնատների գույքահարկն ավելացնելու նախագիծը հասել է ԱԺ. ՏԵՍԱՆՅՈՒԹ

ՀՀ Ազգային ժողովը քննարկում է անշարժ գույքի միասնական գնահատման և հարկման համակարգի ներդրմանը նպաստող օրենքի նախագիծը: Նշենք, որ օրինագծով նախատեսված է գույքահարկի՝ որպես սեփականությունից գանձվող հարկերի հորիզոնական և ուղղահայաց արդարության սկզբունքների ամրապնդում, հարկային բեռի արդարացի և հավասարաչափ բաշխում՝ առանց նվազ ապահովված հարկ վճարողների հարկային բեռի ավելացման:

ԱԺ «Բարգավաճ Հայաստան» խմբակցության պատգամավոր Արման Աբովյանը հարցի հարակից զեկուցող Բաբկեն Թունյանից հետաքրքրվեց, թե Երևանի տարբեր վարչական շրջաններում որքանո՞վ է ավելանալու գույքահարկը։

«Հիմա հստակ հարց՝ Կենտրոն, Կոմիտաս, Զեյթուն… որքանո՞վ  կթանկանա այս շրջաններում երկու սենյականոց  բնակարանի գույքահարկը: Հուսամ՝ տվյալներն ունեք, հետևաբար, եկեք հնչեցնենք թանկացումների տոկոսադրույքները, որ մեր քաղաքացիներն իմանան»,- ասաց Աբովյանը։

«Իմ քայլը» խմբակցության պատգամավոր Բաբկեն Թունյանը նշեց, որ հիմա որոշում են գույքահարկի արժեքը, իսկ  որքանո՞վ կթանկանա հարցին կկարողանա պատասխանել, երբ կլինեն համապատասխան վերանայումներ:

«350 մլն դրամ կադաստրային արժեք ունեցող առանձնատունը հիմա վճարում է գույքահարկ 3.2 մլն դրամ, այս փոփոխություններից հետո կվճարի 28 մլն դրամ։ Սա վերևի շեմն է, իսկ ներքևի շեմի համար կարող է որևէ բան չփոխվել։ Հարգելի՛ տատիկ-պապիկներ ջան, կարող եք հանգիստ լինել, այս օրենքն ընդունելու դեպքում ձեր գույքահարկը չի թանկանա: Բայց հարգելի՛ խոշոր սեփականատերեր ջան, եթե ունեք շատ բարձր արժեքով անշարժ գույք, որի համար կոպեկներ եք վճարում, այս օրենքն ընդունելուց հետո ձեզ համար հաստատ գույքահարկը կթանկանա»,- ասաց Բաբկեն Թունյանը։

Մանրամասները՝ տեսանյութում:

Աղավնի Սուքիասյան