Ժողովրդի համբերության բաժակը կարող է լցվել երկրորդ անգամ». Գևորգ Պետրոսյան. ՏԵՍԱՆՅՈՒԹ

-Երեկ վարչապետն ասել է, որ Ամուլսարի չշահագործման համար իրավական որևէ հիմք չկա։ Դուք դե՞մ եք շահագործմանը։

-Այո՛։

-Հիմքեր կա՞ն, որպեսզի չշահագործվի Ամուլսարը։

-Դա այն պատճառաբանությունն է, որ եթե իսկապես կար, պետք է առաջին օրն ասվեր։ Քանի՞ ամիս էր պետք, որպեսզի հասկանային, որ իրավական հիմքեր չունեն չշահագործելու։ Համենայնդեպս՝ նման դեպքերում, երբ պաշտոնյան տեղյակ է խնդրի էությանը, շրջապատված է տարբեր խորհրդականներով, տարբեր ոլորտի, այդ թվում՝ իրավաբան-խորհրդականներով, և դա պետք էր ժամանակին ասել։ Եթե իսկապես իրավական հիմքեր չկան չշահագործելու, դա պետք էր մատչելի լեզվով ներկայացնել ժողովրդին, և ժողովուրդը դա կհասկանար։

Համենայնդեպս՝ ես կարծում եմ, որ իրականում դա այդպես չէ։ Իրավական հիմքեր կան, այստեղ այլ պարտավորություններ կատարելու կամ չկատարելու խնդիր կա։ ԲՀԿ-ն և համանուն խմբակցության նախագահ Գագիկ Ծառուկյանը երեկ հայտարարեցին, որ ինչպես մյուս դեպքերում, այնպես էլ այս պարագայում մենք ժողովրդի կողքին ենք։ Եթե իրենք չեն կարողանում ժողովրդին համոզել, դա իշխանության խնդիրն է, եթե իշխանությունը ժողովրդին չի կարողանում համոզել իր տեսակետի հիմնավորվածության, իրավացիության, ժողովրդանպաստ լինելու մեջ, դա իշխանության խնդիրն է, ոչ մեկը պարտավոր չէ իշխանության գործը հանձն առնել, ինքը անել։

Վախենամ՝ սա միակ դեպքը չլինի, երբ իշխանության գալուց առաջ քաղաքական ուժն ասի մի բան, իշխանության մեջ հայտնվելով՝ փոխի կեցվածքը։ Սա ժողովրդական վստահությունն արագ սպառելու ամենակարճ ճանապարհն է։ Շատ են լինում դեպքեր, երբ մենք՝ ընդդիմադիրներս, մեղադրում ենք Կառավարությանն այս կամ այն ոլորտում թերակատարումների կամ բացթողումների, տրված խոստումներն ընդհանրապես չկատարելու մեջ, մեզ հակադարձում են, թե գիտե՞ք ինչ, այնքան է ոլորտը թալանված եղել, այնքան է ապականված եղել, այնքան խարխուլ ենք մենք այդ ժառանգությունն ընդունել։ Եղբայր, եթե դա այդպես է, այդ դեպքում պարտավոր էիք ժողովրդին նախընտրական քարոզչության ընթացքում ասել՝ հարգելի՛ ժողովուրդ, մենք որ գալիս ենք իշխանության, առաջիկա երկու-երեք տարին մեզ հետ հույսեր չկապեք, որ նշանակալի բարեփոխումներ կիրականացնենք։ Մինչդեռ ես հիշում եմ քարոզարշավը շատ լավ, և այսօրվա իշխանավորները, որոնք աթոռներ են զբաղեցնում Հանրապետության հրապարակի գեղատեսիլ շենքում, իրենք նման բաներ չէին ասում։ Ասում էին՝ ժողովո՛ւրդ ջան, շատ կարճ ժամանակ հետո, ամիսներ հետո կզգաք տարբերությունը, սոցիալական ապահովության, առողջապահության, զբաղվածության ոլորտում։ Բա ո՞ւր է, որ ժողովուրդը չի զգում։

Գիտեք՝ մարդու կյանքը 300 տարի չէ, որ մի 10 տարի նախորդ իշխանության խոստումներին հավատա, մի 10 տարի՝ այս իշխանության, մի 10 տարի՝ եկող իշխանության: Լավ, ինչքա՞ն կարելի է։ Ժողովրդի համբերության բաժակը մի անգամ լցվեց, դատարկվեց։ Վտանգ կա, որ ևս մի անգամ կարող է լցվել։

Մանրամասները՝ տեսանյութում:

Մհեր Արշակյան