Քաղաքականություն
10.09.2019 | 17:25Ժամանակն է մերժել խաբեբաներին։ Այս մասին այսօր Ազգային ժողովում հայտարարությունների ժամին ասաց ԱԺ «Իմ քայլը» խմբակցության պատգամավոր Թագուհի Թովմասյանը՝անդրադառնալով Սևանա լճում ձկնաբուծության զարգացմանը:
Ըստ պատգամավորի՝ դեռևս 2013 թվականին, երբ ՀՀ վարչապետը Տիգրան Սարգսյանն էր, ՀՀ կառավարությունը ստեղծեց Սևանի իշխանի պաշարների վերականգնման և ձկնաբուծության զարգացման հիմնադրամ, այնուհետև ստեղծվեցին ևս երկու նմանատիպ ընկերություններ, որոնցից մեկի նախագահի տեղակալը Սերժ Սարգսյանի խորհրդականն էր։ Ըստ պատգամավորի՝ այս ընկերությունները ստացել են ընդհանուր առմամբ 11 միլիարդ դրամի պետական աջակցություն, նրանց է 25 տարով հանձնվել 200 հեկտար տարածք՝ հիմնականում Գեղարքունիքի մարզում։
«11 միլիարդ դրամ փող են ստացել, որ ստեղծեն 2000 աշխատատեղ, սակայն այս տարիների ընթացքում ստեղծել են ընդամենը 10-12 աշխատատեղ և չեն կատարել այն ընթացակարգերը, որոնք, որ պարտավորվել էին անել։ Ավելին՝ 2 տարի առաջ էլ հայտարարեցին, որ ցանցաթաղանթը պատռվել է, կորել է մոտ 12 տոննա ձուկ և այժմ Սևանին մանրաձուկ էլ չեն կարողանում մատակարարել», -ասաց պատգամավորը՝ նշելով, որ ժամանակն է, որ Կառավարությունը խստագույնս զբաղվի այս ընկերություններով։
Նշենք, որ ըստ պատգամավորի՝ խոսքը գնում է Սևանի իշխանի պաշարների վերականգնման և ձկնաբուծության զարգացման հիմնադրամի, «Սևանի իշխան» և «Սևան ԱԿՎԱ» ընկերությունների մասին։
Մանրամասները՝ տեսանյութում։
Աղավնի Սուքիասյան
