Արման Բաբաջանյանը չհրաժարվեց մանդատից․ կմնա անկախ պատգամավոր․ ՏԵՍԱՆՅՈՒԹ

Անցած մի քանի օրերը եղել են կյանքիս թերևս ամենադժվարին օրերը, քանի որ ստիպված եմ եղել կայացնել չափազանց դժվար որոշումներ։

Այս մասին այսօր՝ սեպտեմբերի 10-ին, խորհրդարանական հայտարարությունների ժամին ասաց պատգամավոր Արման Բաբաջանյանը։

«Անցած շաբաթվա վերջին ես հայտարարեցի ԱԺ «Լուսավոր Հայաստան» խմբակցությունից հեռանալու մասին։ Դա որոշումներից ամենադժվարին էր, քանի որ ստիպված եմ հեռանալ ինձ շատ հարազատ թիմից, որի հետ մի քանի ամիս առաջ մասնակցել եմ ընտրությունների, անցել եմ դժվարին ճանապարհ, հաղթահարել եմ բազմաթիվ մարտահրավերներ։ Այդ որոշումը, սակայն, անխուսափելի էր։ Խմբակցությունից դուրս գալու որոշումը կապված է ոչ թե խմբակցության, այլ քաղաքական համակարգի հետ և իրականում այդ որոշման խորքային դրդապատճառները կապված են  ոչ այնքան  «Լուսավոր Հայաստան» խմբակցության, որքան մեր ընդհանուր քաղաքական համակարգի ախտերի հետ»,- ասաց  պատգամավորը՝ համոզմունք հայտնելով, որ նոր Հայաստանը, որի հիմքը դրվել է 2018 թվականի թավշյա հեղափոխությամբ, կարիք ունի միանգամայն նոր քաղաքական համակարգի, նոր քաղաքական գաղափարների ու սկզբունքների, որոնք, սակայն, ինքը չի տեսնում ո՛չ «Լուսավոր Հայաստան» խմբակցությունում, ո՛չ մնացած խորհրդարանական ուժերում։

«Թավշյա հեղափոխությամբ մենք, բարեբախտաբար, ստեղծել ենք ժողովրդավարական պետություն,  սակայն, դժբախտաբար, շարունակում ենք վարել այն արտաքին քաղաքականությունը, որը իրականացնում էր նախորդ ավտորիտար իշխանությունը։ Անցած 1.5 տարիներին մենք այս դահլիճում չենք լսել մեր արտաքին քաղաքականության վերափոխման անհրաժեշտության մասին ծրագրեր, թեզեր, գաղափարներ, շարունակել ենք նախկին իներցիան այն դեպքում, երբ ժողովրդավարացած, վերափոխված Հայաստանը աշխարհի հետ պետք է հարաբերվեր, խոսեր այլ լեզվով, նոր օրակարգերով ու նախաձեռնություններով»,- ասաց նա՝ ընդգծելով, որ վայր չի դնելու իր պատգամավորական մանդատը և շարունակելու է իր գործունեությունը որպես անկախ պատգամավոր։

«Ես հետայսու անկախ պատգամավորի կարգավիճակում անելու եմ առավելագույնը այդ սուրբ նպատակով ուժերին ու անհատներին միավորելու ու նրանց ներուժը ի բարօրություն Հայաստանի ու հայոց պետականության, հայ ժողովրդին ծառայեցնելու համար»,- ասաց նա։

Մանրամասները՝ տեսանյութում:

Աղավնի Սուքիասյան