12.10.2026 | 23:18
Գազամատակարարման դադարեցումներ՝ Հայաստանի մի շարք հասցեներում
Եթե ոտնձգություններ իրականացվեն Իրաքյան Քուրդիստանի թուրքմեն բնակչության նկատմամբ, ապա կդիմենք ռազմական գործողությունների. Չավուշօղլու
Քաղաքականություն
25.09.2017 | 20:44
Թուրքիայի արտաքին գործերի նախարար Մևլութ Չավուշօղլուն իրաքյան Քուրդիստանի ղեկավարությանը զգուշացրել է, որ եթե ոտնձգություններ իրականացվեն իրաքյան Քուրդիստանի թուրքմեն բնակչության նկատմամբ, ապա իրենք կդիմեն ռազմական գործողությունների. փոխանցում է ermenihaber-ը:
Միջանկյալ նշենք, որ պաշտոնական Անկարան չի ճանաչում այսօր իրաքյան Քուրդիստանում մեկնարկած անկախության հանրաքվեն՝ համարելով, որ դրանով խախտվում է Իրաքի տարածքային ամբողջականությունը և սահմանադրությունը:
Ըստ թուրքական «Milliyet» թերթի կայքի՝ Չավուշօղլուն ասել է, որ այս պահից սկսած, ստեղծված ճգնաժամային պայմաններում Անկարան միայն բանակցելու է Իրաքի ղեկավարության հետ:
Խոսելով իրաքյան Քուրդիստանի ղեկավարներին Թուրքիայի կողմից արված բազմաթիվ կոչերի մասին՝ Թուրքիայի արտգործնախարարը մասնավորապես ասել է.
«Մենք բարեկամական հորդրո արեցինք նրանց, զգուշացումներ էլ արեցինք: Այս պահին սահմանային անցակետերի փակման մասին խոսք չկա, միայն կա խստացման հարց: Մեր կողմից իրականացվելու են քայլեր: Այս պահին այդ հարցերը քննարկում ենք: Հյուսիսային Իրաքի քրդական ինքնավար շրջանի ղեկավարությունը հասկացրեց, որ գնալու են իրենց ճանապարհով: Դե մենք էլ ասացինք, որ դրա դիմաց վճարելու են ու այդպես էլ կլինի»,-ասել է Չավուշօղլուն:
Վերջինս հավելել է, որ Թուրքիան դադարեցնելու է մարզել Քուրդիստանի զինված ուժերին, որոնք հայտնի են «փեշմերգա» անվանումով:
Թուրքիայի արտգործնախարը հիշեցրել է, որ իրենք «փեշմերգա»-ին մարզում էին դեռևս Սադամ Հուսեյնի ժամանակներից, ընդհուպ մինչև տարածաշրջանում «Իսլամական պետությունը» ահաբեկչական կազմակերպության հայտնվելը:
