«Քաղաքական համակարգին երկրաշարժ է մոտենում»․ Անդրիաս Ղուկասյան. ՏԵՍԱՆՅՈՒԹ

Factor TV-ի զրուցակիցն է «Հայ կառուցողական կուսակցության» նախագահ Անդրեաս Ղուկասյանը

-Պարոն Ղուկասյան, երեկ վարչապետը հանդիպել է «Սասնա Ծռեր» կուսակցության ղեկավարների հետ։ Ձեր կարծիքով ինչո՞վ էր թելադրված այդ հանդիպումը։

-Ես դժվարանում եմ այդ հարցին պատասխանել, բայց ենթադրում եմ, որ երկու կողմն էլ ուներ պատճառներ հանդիպման, քանի որ այն կայացել է, դա վկայում է, որ փոխադարձ հետաքրքրություններ ունեն միմյանց նկատմամբ։

-Այսինքն, «Սասնա Ծռերը» դառնում է քաղաքական լուրջ գործո՞ն դաշտում։

-Հավանաբար, «Սասնա Ծռերը» խնդիր ունի դատական գործընթացի հետ, առ այսօր նրանք չեն կարողացել ինչ-որ բան փոխել դատական գործընթացի մեջ, և այն ինչ կա, իրենց տանում է դատապարտման։ Ես ակնկալում էի, որ նրանց գործում հեղափոխությունից հետո կլինի վերանայում և ըստ քրեական իրավունքի ճիշտ կիրառման՝ նրանք կարող էին մեղադրվել ինքնիրավչության համար։ Իսկ այդ իրավունքն ասում է, որ այն դեպքերում, երբ պատանդների կամ շենքերի գրավումը տեղի է ունենում օրինական պահանջի համար, նման դեպքում այդպիսի դեպքերը գնահատվում են որպես ինքնիրավչություն։

-Այսօր հայտնի է դարձել նաև, որ «Լուսավոր Հայաստան» խմբակցությունից հեռացել է Արման Բաբաջանյանը։ Նա, իհարկե, իր քայլը բացատրել է նրանով, որ իր խմբակցությունը կտրված է նոր Հայաստանի քաղաքական օրակարգից։ Ըստ Ձեզ ի՞նչ է տեղի ունենում։

-Ինչ-որ մի երկրաշարժ է մոտենում քաղաքական համակարգին, ՍԴ վերջին որոշումից հետո դա ավելի տեսանելի է։ Երևի կլինի ջրբաժան, ըստ այն բանի, թե ինչպես են քաղաքական ուժերը դիրքավորում Ռոբերտ Քոչարյանի գործոնի նկատմամբ։ Եվ, հավանաբար, կարծում եմ, որ դա կբերի այսպիսի բազմաթիվ իրավիճակների, երբ խորհրդարանական դաշինքներ կփոխվեն, կխզվեն, վերադասավորումներ կառաջանան։ Բաբաջանյանը, իմ կարծիքով, այն գործիչներից է, որը կտրականապես դեմ է Ռոբերտ Քոչարյանի ազատ արձակմանը, ենթադրում եմ, որ որևէ այլ քաղաքականություն չէր կարող բերել իր խմբակցության հետ հակասությունների։ Մենք շուտով դրա հանգուցալուծումը կտեսնենք։

Զրուցեց Մհեր Արշակյանը

Մանրամասները՝ տեսանյութում: