15.12.2025 | 13:49
Ուիթկոֆը հայտարարել է Բեռլինում Զելենսկիի հետ բանակցություններում «նշանակալի առաջընթացի» մասին
Երեկվա բունտից հետո դատապարտյալները խաղաղվել են
Հասարակություն
06.09.2019 | 12:15
Երեկ մամուլը գրեց, որ զանգվածային անկարգություններ են սկսվել ՀՀ մի շարք քրեակատարողական հիմնարկներում։
Ըստ հրապարակումների՝ պատճառը Արդարադատության նախարարության այն օրինագիծն է, համաձայն որի` քրեական պատասխանատվություն է նախատեսվում քրեական աստիճանակարգության, բարձրագույն կարգավիճակ տալու կամ ստանալու, քրեական ենթամշակույթ կրող խմբավորում ստեղծելու կամ ղեկավարելու համար։
Արդարադատության նախարարության հասարակայնության հետ կապերի բաժնի պետ Լուսինե Մարտիրոսյանը Factor.am-ին ասաց, որ ներկայում իրավիճակը գտնվում է նախարարության վերահսկողության ներքո, անհնազանդություններ չկան։ Նախարարությունից, սակայն, չմեկնաբանեցին, թե արդյոք անհնազանդությունները կապվա՞ծ են օրինագծի հետ։
Նշենք, որ Կառավարությունը հավանություն է տվել որոշ դատապարտյալների կողմից դժգոհության արժանացած օրինագծին, իսկ վարչապետ Նիկոլ Փաշինյանն էլ ասել է․ «Այս ենթամշակույթի մարդիկ բանտը համարում են իրենց տունը, և, հետևաբար, պետք է նրանց բոլորին ուղարկել իրենց տուն՝ ապրելու»։
Քրեակատարողական վարչության հանրային կապերի բաժնի պետ Նոնա Նավիկյանը Factor.am-ին ասաց, որ այս պահին մանրամասներ հաղորդել չի կարող, թե արդյոք կան այդ գործողությունների հետևանքով տուժած կամ պատժախուց տեղափոխված դատապարտյալներ: «Միայն կարող եմ ասել, որ իրավիճակը վերահսկելի է»,- եզրափակեց նա։
Լիլիթ Շաբոյան
