Հայաստանի ազգային գրադարանում բացվեց Գրատպության թանգարանը

Ս. թ. սեպտեմբերի 25-ին, Հայաստանի ազգային գրադարանում բացվեց Գրատպության թանգարանը:
Գրատպության թանգարանը բացելուց առաջ մշակույթի նախարար Արմեն Ամիրյանը գնեց առաջին այցելուի տոմսը։ «Այսօր փառահեղ օր է, որովհետև բացում ենք մեր երազանքի թանգարաններից մեկը։ Գաղափարը ծնվել է 2012 թվականին, երբ ՅՈՒՆԵՍԿՕ-ն Երևանը հռչակել էր Գրքի համաշխարհային մայրաքաղաք, և տոնվում էր հայ գրքի տպագրության 500-ամյա հոբելյանը։ Հոբելյանական հանձնաժողովը, որը գլխավորում էր Նախագահ Սերժ Սարգսյանը, Հայաստանում գրատպության թանգարան հիմնելու որոշում կայացրեց»,- ասաց նախարարը։

Տիգրան Զարգարյանի խոսքով, աշխարհի շատ քիչ երկրներում են գործում նման թանգարաններ։ Այս թանգարանի 6 սրահները ներկայացնում են հայերեն տպագիր գրքի անցած ճանապարհը՝ սկսած նախագրային շրջանից։ Այն հագեցած է նոր տեխնոլոգիաներով, ինչը ստեղծում է ոչ ֆորմալ կրթության ինտերակտիվ միջավայր, և ուսուցողական նշանակություն ունի։ 

Այստեղ է ներկայացված հայերեն առաջին տպագիր գիրքը՝ «Ուրբաթագիրքը» (Վենետիկ, 1512 թ.), առաջին տպագիր Աստվածաշունչը (Ամստերդամ, 1666-1668 թթ.), առաջին տպագիր քարտեզը՝ «Համատարած աշխարհացոյցը» (Ամստերդամ, 1695 թ.), առաջին տպագիր պարբերականը՝ «Ազդարարը (Մադրաս, 1794-1796 թթ.) և արժեքավոր այլ տպագրություններ, տպագրական հին մեքենաներ, սարքեր և այլն:

Գրատպության թանգարանից հեռանալիս նախարարը թեմատիկ հուշանվերներ գնեց. «Այն զգայական տպավորությունը, որն այցելուն ստանում է թանգարանում, ուզում է որևէ բանով շոշափելի դարձնել, և դա անում է հուշանվերների միջոցով»։ 
Թանգարանը դառնալու է նաև հայ գրքի հետազոտման կենտրոն։