Քանի դեռ սննդամթերքի անվտանգության կառավարման համակարգի պարտադիր ներդրման պահանջ չկա, սննդային անվտանգության խնդիրը չի լուծվի. Դավիթ Պիպոյան

Հանրային սննդի կետերում սննդամթերքի անվտանգության կառավարման համակարգերի ներդրումը պարտադիր պահանջ է և այս պահին օրհասական խնդիր է: Այսօր լրագրողների հետ հանդիպմանն անդրադառնալով օրերս Գյումրիում արձանագրված թունավորման դեպքին՝ ասաց ՀՀ ԳԱԱ Էկոկենտրոնի սննդի շղթայի ռիսկերի գնահատման կենտրոնի ղեկավար Դավիթ Պիպոյանը:

Նրա խոսքով, երբ ամռան սեզոնի սկզբին առաջին թունավորման դեպքն արձանագրվեց, ինքը նշեց, որ սա մեկ ռեստորանի խնդիր չէ, և որևէ մեկը չի երաշխավորում, որ վաղը նույնատիպ դեպք չի լինելու և բազմաթիվ մարդկանց թունավորման պատճառ չի հանդիսանալու:

«Ամբողջ աշխարհում հանրային առողջապահական խնդիրները, մասնավորապես՝ մարդկանց թունավորումները, ոչ թե վարչական պատասխանատվության ենթակա պատժամիջոցներ են ենթադրում, այլ քրեական: Այսինքն՝ ինչպե՞ս կարող ես դու 47 մարդու թունավորման պատճառ հանդիսանալ և ընդամենը սահմանափակվես մի քանի դրամ տուգանքով: Այս դեպքում մենք գործ ունենք ինստիտուցիոնալ խնդիրների և բարեփոխումների հետ, որը, ցավոք, մեր երկիրը տարիներ շարունակ չի իրականացնում»,- ասաց Դավիթ Պիպոյանը:

Սննդագետի պնդմամբ՝ մեր երկրում ամեն օր ոտնահարվում է Սննդամթերքի անվտանգության պետական վերահսկողության մասին օրենքը. «Դրանում հստակ նշված է, որ մեր երկրում և՛ քաղաքականությունը, և՛ ընդհանրապես սննդամթերքի անվտանգության կառավարումը պետք է հիմնված լինի գնահատված ռիսկերի վրա: Այսինքն՝ պարտադիր կերպով պետք է սննդամթերքի անվտանգության ոլորտում իրականացնել ռիսկի գնահատում, ընդ որում՝ դա պետք է կատարի գիտական կենտրոնը»:

Դավիթ Պիպոյանը կարծում է, որ քանի դեռ հանրային սննդի կետերում և իրացման ցանցերում սննդամթերքի անվտանգության կառավարման համակարգերի պարտադիր ներդրման պահանջ չկա, սննդային անվտանգության խնդիրը չի լուծվի։