23.07.2026 | 15:19
Արարատում կկառուցվի 2 բազմաբնակարան բնակելի շենք. կլուծվի 48 ընտանիքի բնակարանային ապահովման հարցը
Հայտնի է գյումրեցի 57-ամյա կնոջը սպանած ռուս զինծառայողի գործով առաջին դատական նիստի օրը
Հասարակություն
05.09.2019 | 15:26
Գյումրի քաղաքի 57-ամյա բնակչուհի Ջուլիետա Ղուկասյանի սպանության գործով նախաքննությունն ավարտվել է, սեպտեմբերի 6-ին Շիրակի մարզի ընդհանուր իրավասության դատարանում տեղի կունենա առաջին դատական նիստը: Այն վարելու է դատավոր Ադրինե Ղուկասյանը։
Հիշեցնենք՝ 2018 թվականի դեկտեմբերի 2-ին Ջուլիետա Ղուկասյանն իր տան մոտ ծեծի ենթարկվելու հետևանքով մահացել է: Քննությամբ պարզվել է, որ հանցագործությունը կատարել է ՌԴ քաղաքացի, Գյումրիում տեղակայված ռուսական ռազմաբազայի պայմանագրային զինծառայող, վարորդ-մեխանիկ Անդրեյ Ռազգիլդեևը:
Datalex.am-ում հրապարակված մեղադրական եզրակացության համաձայն՝ Անդրեյ Ռազգիլդեևին մեղադրանք է առաջադրվել այն բանի համար, որ նա 2018 թվականի դեկտեմբերի 2-ին ժամը 07:00-ի սահմաններում, գտնվելով ալկոհոլի ազդեցության տակ, Գյումրի քաղաքի Մայակովսկի փողոցում տեսել է Շահումյան փողոց տանող ուղղությամբ քայլող Գյումրի քաղաքի Աճեմյան փողոցի 26-րդ շենքի 12-րդ բնակարանի բնակիչ, 1961 թվականին ծնված Ջուլիետտա Ստյոպայի Ղուկասյանին և հետևել նրան: Ջուլիետտա Ղուկասյանը, խուսափելով Անդրեյ Ռազգիլդեևից, փոխել է ուղղությունը և քայլել նույն փողոցի 28-րդ և 30-րդ հասցեներում գտնվող սեփական տների ուղղությամբ, որտեղ էլ Անդրեյ Ռազգիլդեևը, հասնելով Ջուլիետտա Ղուկասյանին, դիտավորությամբ բազմաթիվ հարվածներ է հասցրել նրա գլխին և մարմնի տարբեր մասերին՝ պատճառելով մարմնական վնասվածքներ և անզգուշությամբ առաջացնելով Ջուլիետտա Ղուկասյանի մահը:
Ջուլիետտա Ղուկասյանը մարմնական վնասվածքներով տեղափոխվել է «Գյումրի բժշկական կենտրոն», որտեղ էլ նույն օրը ժամը 11:30-ին մահացել է:
Ռուս զինծառայողին մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 14-րդ կետով (դիտավորությամբ առողջությանը ծանր վնաս հասցնելը, որն անզգուշությամբ առաջացրել է մահ)։
Նշենք, որ տուժողի իրավահաջորդի ներկայացուցիչը Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցն է:
Ի դեպ՝ տուժողի իրավահաջորդի ներկայացուցիչների՝ Անդրեյ Ռազգիլդեևին ՀՀ քրեկատարողական հիմնարկ տեղափոխելու միջնորդությունը Շիրակի մարզի առաջին ատյանի, ապա Վերաքննիչ դատարանները մերժել են: 2019թ-ին հուլիսի 19-ին էլ տուժող կողմը նշված որոշումները բողոքարկել է Վճռաբեկ դատարանում։
Ռազգիլդեևը ձերբակալումից ի վեր պահվում է ռուսական ռազմաբազայում։ Նրա շահերը կպաշտպանի փաստաբան Նարինե Ռշտունին։
Էմմա Չոբանյան
