08.11.2026 | 00:09
Կրակոցներ Կրակովի կենտրոնում․ զոհերի թիվը հասել է 6-ի, կա 15 վիրավոր
Հարավային Օսիան Վրաստանի հետ սահմանին բարձունք է զբաղեցրել
Քաղաքականություն
05.09.2019 | 14:17
Հարավային Օսիան Վրաստանի հետ սահմանային Ուիստա գյուղի շրջանում բարձունք է զբաղեցրել և դրոշ տեղադրել: Ավելի վաղ այստեղ վրացական ոստիկանական անցակետ էր տեղակայվել: Այս մասին գրում է ՏԱՍՍ-ը՝ վկայակոչելով հանրապետության պետանվտանգության կոմիտեի հայտարարությունը:
Գերատեսչությունում նշել են, որ օգոստոսի 23-ից այստեղ Վրաստանի ՆԳՆ-ի ստորաբաժանումների հսկողությամբ սահմանային ոստիկանության անցակետ է կառուցվում՝ հավելելով, որ Վրաստանի «սադրիչ գործողություններն ուղղված են Հարավային Օսիայի սահմանային տարածքի մի մասի բռնակցմանը, այդ թվում՝ Ուիստա գյուղի արևմտյան մասն ու նախկին «Յուգոստալկ» գործարանի մերձակայքը»:
«Հարավային Օսիայի ՊԱԿ-ի սահմանային ծառայության գործողությունները վտանգ չեն ներկայացնում սահմանային Կոբի և Չորչոնա բնակավայրերի բնակիչների համար և ուղղված են սահմանային ռեժիմի պահպանմանը, Հարավային Օսիայի Հանրապետության քաղաքացիների անվտանգության ապահովմանը»,- հայտարարել են ՊԱԿ-ում:
Այստեղ նշել են նաև, որ հանրապետության բնակիչների անվտանգությանն ուղղված սպառնալիքն աճում է, ինչի մասին է վկայում վրաց ուժայինների կողմից Գլխավոր դատախազության անօդաչուի ուղղությամբ արձակված կրակը:
Նշենք, որ անցյալ շաբաթ Հարավային Օսիան հայտարարել էր Վրաստանի կողմից սահմանամերձ Ուիստա գյուղի մերձակայքում ոստիկանական անցակետի կառուցման մասին՝ պահանջելով հեռացնել այն: Հարավօսական աղբյուրների տեղեկացմամբ՝ սեպտեմբերի 1-ին էլ վրացական կողմը թիրախային կրակոցով խոցել է հանրապետության Գլխավոր դատախազության անօդաչուն, որը հետաքննական գործողությունների համար էր օգտագործվում:
Ներկայում Հարավային Օսիայի և Վրաստանի միջև բանակցություններն ընթանում են Միջադեպերի կանխարգելման և արձագանքման մեխանիզմի ձևաչափով, որը ստեղծվել է 2009 թվականի փետրվարին Ժնևյան երկխոսության շրջանակում: Սեպտեմբերի 2-ին կայացած բանակցությունների վերջին փուլն անարդյունք է ավարտվել:
