Որ դեպքում վարորդները կհեռացվեն երթևեկությունից․ առաջարկվող փոփոխություններ՝ օրենքում․ ՏԵՍԱՆՅՈՒԹ

Կառավարությունը «Քրեական օրենսգրքում» և «Վարչական իրավախախտումների մասին» օրենքներում  լրացումներ և փոփոխություններ կատարելու նախաձեռնությամբ է հանդես եկել:

Այդ փոփոխություններով առաջարկվում է վերանայել ճանապարհային երթևեկության ոլորտում թույլ տրվող վարչական իրավախախտումների համար սահմանված տուգանքների չափերը և ներդնել տուգանային (ոչ նյութական) միավորների համակարգ, որը միտված է լինելու ճանապարհային երթևեկության ոլորտում թույլ տրվող իրավախախտումների կանխարգելմանը:

Ըստ նախագծի՝ Ոստիկանությունում առկա վիճակագրության հիման վրա կատարված կանխատեսումների համաձայն` նախագծերի ընդունման և նոր նախատեսվող սանկցիաների կիրառման առաջին 12 ամսվա ընթացքում պետական բյուջեի մուտքերը, բոլոր հավասար պայմաններում, կարող են նվազել շուրջ 2.7 մլրդ դրամի չափով: Միաժամանակ, տուգանային միավորների համակարգի ներդրման համար անհրաժեշտ տեխնիկական հագեցվածության ապահովման նպատակով պետական բյուջեի ծախսերը կավելանան 1.1 մլրդ դրամի չափով: Ծախսերը նախատեսվում է կատարել ճանապարհային ոստիկանության ընթացիկ տարվա արտաբյուջետային միջոցների հաշվին` նախահաշիվներում համապատասխան փոփոխություններ և լրացումներ կատարելու միջոցով:

Քրեական օրենսգրքում նախատեսվող փոփոխություններով առաջարկվում է տրանսպորտային միջոցներ վարելու իրավունք չունեցող անձի կողմից տրանսպորտային միջոց վարելը նույն արարքի համար վարչական տույժ նշանակելուց հետո` մեկ տարվա ընթացքում որպես պատիժ սահմանել նվազագույն աշխատավարձի երկուհարյուրապատիկից երեքհարյուրապատիկի չափով կամ կալանքով` մինչեւ երկու ամիս ժամկետով` որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` առավելագույնը մեկ տարի ժամկետով:

Նախագծերում առաջարկվող փոփոխությունները Ազգային ժողովում ներկայացնող ՀՀ ոստիկանության պետի տեղակալ Հովհաննես Քոչարյանը նշեց, որ առաջարկվող փոփոխությունների նպատակն է չարամիտ և պարբերաբար խախտումներ անող վարորդներին հեռացնել երթևեկությունից։

Մանրամասները՝ տեսանյութում։