«Էկո Ֆիշ Ֆեստ»՝ Սևանում. ինչպես կփակվի լողալու սեզոնը Գեղարքունիքի մարզում

Այս տարվա սեպտեմբերի 14-ին Սևանի թերակղզու տարածքում տեղի կունենա «Էկո Ֆիշ Ֆեստ» փառատոնը, որին ընդառաջ տեղի կունենա մեծ շաբաթօրյակ, որի նպատակն է մաքրել Սևանի ողջ տարածքը:

Այդ շաբաթօրյակին կմասնակցեն Գեղարքունիք մարզի բոլոր պետական կառույցները, ինչպես նաև «Սևան ազգային պարկը»:

««Էկո Ֆիշ Ֆեստ» փառատոնի առաջին մասը, փաստորեն, լինելու է համասևանյան շաբաթօրյակը, որի նպատակն է լողալու սեզոնի փակման հետ մեկտեղ շնորհակալություն հայտնել լճին»,- այսօր հրավիրված մամուլի ասուլիսի ժամանակ ասաց Գեղարքունիքի մարզպետ Գնել Սանոսյանը:

Անդրադառնալով Սևանա լճում իրականացվող ձկնորսությանը՝ Սանոսյանը նշեց, որ այս փառատոնի նպատակն է նաև ձկնորսության ոլորտը կարգավորել, արդեն մշակվել է պիլոտային ծրագիր, որով փորձ է արվելու ձկնորսության ոլորտը բերել օրենքի դաշտ:

Ասուլիսին ներկա «Ռեստորանների հայկական ասոցիացիայի» գործադիր տնօրեն Վահե Գևորգյանն էլ նշեց, որ «Էկո Ֆիշ Ֆեստ» փառատոնն առաջինն է, որը հավակնում է դառնալ ամենամյա և ապահովել նաև հաջորդ տարիների համար միջազգային ներկայություն:

«Որպես փառատոն, սա «Ռեստորանների միության» առաջին փորձն է: «Էկո Ֆիշ Ֆեստ»-ին մասնակցելու են տեղական և մարզային ռեստորաններ՝ ավելի քան 30 տաղավարով: Փառատոնը սկսվելու է երեկոյան ժամը 17:00-ին, մեկնարկելու է համերգային ծրագրով, իսկ ավարտվելու է երեկոյան նավերի վրա հրավառությամբ: Այս փառատոնին «Ռեստորանների միությունը» մասնակցում է ՄԱԿ-ի ինտեգրված գյուղական զբոսաշրջության զարգացման ծրագրի հետ»,- ասաց  Գրիգորյանը:

Գեղարքունիքի տուրիզմի զարգացման և հետազոտական կենտրոնի համակարգող Արեգ Սինանյանն էլ կարևորեց մազրային փառատոների անցկացումը՝ զբոսաշրջիկների հոսքերը մարզեր ուղղորդելու և գաստրոտուրիզմի զարգացման տեսանկյունից:

Աղավնի Սուքիասյան