Գյումրիի պատմական կենտրոնում նոր ներդրումներ են սպասվում. այս տարի արդեն որոշ ծրագրեր կիրականացվեն

Գյումրիի օրվան նվիրված տոնակատարությունների շրջանակում օգոստոսի 25-ին բացվեց քաղաքի պատմական կենտրոնում գտնվող Շիրազի փողոցը։ Ամբողջությամբ հիմնանորոգվել են փողոցի երթևեկելի մասն ու մայթերը, նոր կայուղացանց է անցկացվել։ Սա, Ռուսթավելիից հետո, Գյումրիի պատմական կենտրոնի՝ հիմնանորոգված երկրորդ փողոցն է:

Ակնկալվում է, որ փողոցների հիմնանորոգումը նպաստելու է Գյումրիի պատմական կենտրոնում ներդրումների իրականացմանը, ինչին էլ միտված է ծրագիրը: Քաղաքի այս հատվածը նախատեսվում է վերածել զբոսաշրջային գոտու. այստեղ ստեղծվելու են արվեստի, արհեստի, ժամանցի կենտրոններ, զբոսաշրջիների համար հրապուրիչ պայմաններ, կյանքի են կոչվելու տարբեր բիզնես ծրագրեր: Գաղափարը նախկին վարչապետ Կարեն Կարարպետյանին էր, որի ճակատագիրը թավշյա հեղափոխությունից հետո անորոշ էր: Հիմա, փաստորեն, այն վերածնվել ու շարունակվում է։

Որոշակի դադարից հետո Գյումրիի պատմական կենտրոնը կրկին գրավիչ է դարձել ներդրումների, բիզնես ծրագրերի իրականացման համար: Factor.am-ի հետ զրույցում Գյումրիի գլխավոր ճարտարապետ Հենրիկ Գասպարյանը նշեց, որ պատմական կենտրոնի նկատմամբ ներդրողների հետաքրքրությունն աճել է, առաջիկայում տարբեր ծրագրեր կիրականացվեն:

«Հետաքրքրությունը հիմա բավական բարձր է։ Պատրաստվում են ներդրումներ Կումայրի արգելոցի ամբողջ տարածքում, պատմական կենտրոնում։ Ներդրողներն էլ հիմնականում մեր համաքաղաքացիներն են, որոնք ապրում են Ռուսաստանում ու արտերկրում, կան նաև Երևանից և Սփյուռքից։ Տարբեր ծրագրեր են նախատեսվում՝ հյուրատներ, առևտրի կենտրոններ, սրճարաններ, սպորտային կառույցներ։ Ծրագիր կա սպորտ սիթիի կառուցման, որի սկիզբն ենք հիմա դնում։ Այն նոր թաղամասերում կկառուցվի»,- ասաց Հենրիկ Գասպարյանը:

Նա, միաժամանակ, հավելեց, որ ներդրումների մասին շատ փակագծեր այս պահին դեռ չի կարող բացել:

«Ներդրումային ծրագրերի մասին չեմ կարող պատմել, հրապարակել, որովհետև ամեն ներդրում իր գաղտնիքն ունի: Մինչև ներդրողի հետ չհամաձայնեցնեմ հրապարակելու իրավունք չունեմ»,- ասաց Գյումրիի գլխավոր ճարտարապետը՝ վստահեցնելով, սակայն, որ այս տարի մի շարք ծրագրեր անպայման կիրականացվեն:

Էմմա Չոբանյան