Գյումրու տիկնիկայինում նոր թատերաշրջանը կմեկնարկի բարեկարգ բեմով. ծրագրվում է նաև հիմնանորոգել տանիքը

Նոր թատերաշրջանի բացմանն ընդառաջ՝ Գյումրու Ստեփան Ալիխանյանի անվան տիկիկային թատրոնում վերանորոգման աշխատանքներ են ընթանում: Հունիսին Factor.am-ը գրել էր, որ քաղաքում տեղացած հորդառատ անձրևներից տիկնիկային թատրոնը հեղեղվել է, տանիքից անձրևաջուրը մեծ հոսքով լցվել է դահլիճն ու վնասել բեմը:

Հիմա Գյումրիի քաղաքապետարանի հատկացրած միջոցներով բեմը վերակառուցվում է:

«Քաղաքապետարանը գումար էր հատկացրել, որ բեմը վերակառուցի, գույք ձեռք բերվի, նաև ջեռուցման կաթսա գնենք: Որոշ չափով օգնական ձեռք եղավ։ Բեմն արդեն սկսել ենք վերակառուցել: Քանի դեռ արձակուրդի մեջ ենք, փորձում ենք արագ անել, որ թատերաշրջանի բացմանը նոր բեմով ներկայանանք»,- Factor.am-ի հետ զրույցում ասաց Գյումրու տիկնիկային թատրոնի տնօրեն Արմենուհի Մանուկյանը։

Թատրոնի համար, սակայն, ամենակարևոր խնդիրը տանիքի հիմնանորոգումն է: Տիկնիկայինի շենքն այսօր խոնավ և անմխիթար վիճակում է հենց կաթոցների հետևանքով: Տնօրենն ուրախությամբ նշում է՝ տանիքի վերանորոգման հարցն ընդգրկվել է Շիրակի մարզի առաջնային լուծում պահանջող խնդիրների ցանկում, հուսով են՝ շուտով սա էլ կնորոգեն:

«Տանիքի վերանորոգման համար Կառավարությունն է գումար հատկացնելու, այն ամբողջապես պիտի վերափոխվի, որովհետև անընդատ կցոնվել է, բայց օգուտ չի բերել, անընդմեջ կաթոցների մեջ ենք եղել։ Հուսանք՝ առաջիկա ամսում աշխատանքները կսկսվեն»,- ասաց Արմենուհի Մանուկյանը։

Թատրոնում ընթացող վերանորոգման աշխատանքներն ու փոքրիկ հադիսատեսի սպասումները մեծ ոգևորություն են առաջացրել ստեղծագործական անձնակազմի մոտ՝ ստիպելով ավելի հետաքրքիր բեմադրություններով ներկայանալ: Նոր ներկայացումներով ու գաղափարներով էլ թատրոնը պատրաստվում է 84-րդ թատերաշրջանի բացմանը: Սեպտեմբերի 14-ին տիկնիկայինը թատերաշրջանի մեկնարկը կտա «Անճոռնի լոլոզիկը» ներկայացմամբ։

«Ինչպես բոլոր թատերաշրջանները, այս թատերաշրջանը ևս բացում ենք նոր ներկայացմամբ։ Դրանից զատ՝ թատրոնում այլ ծրագրեր են իրականացվում։ Թատրոնի շենքը կօգտագործվի որպես մշակութային օջախ ոչ միայն տիկնիկային ներկայացումների համար, այլ ծրագրեր ևս կիրականացվեն: Բացի այդ՝ փորձել ենք մեր ներկայացումներից մեկը՝ «Կարմիր գլխարկով գայլը», այլ կերպ ներկայացնել Գյումրու նվագախմբերից մեկի՝ «Նռանե»-ի հետ։ Պետք է կենդանի երաժշտություն հնչի ներկայացմանը զուգահեռ»,- պատմեց թատրոնի տնօրենը՝ հավելելով, որ փորձելու են սա շարունակական դարձնել՝ ներկայացումներին ներգրավելով նաև այլ խմբերի:

Էմմա Չոբանյան