14.01.2026 | 23:33
Կառավարությունը փոփոխություն է առաջարկում ավագանու անդամների հրաժարականի կարգում
Բաքուն պետք է հրաժարվի ԼՂ կարգավորման հարցով առաջիկա հանդիպումից. Ադրբեջանի ԱԳ նախկին նախարար
Քաղաքականություն
28.08.2019 | 16:04
Պաշտոնական Բաքուն պետք է հստակ հայտարարի, որ հայկական կողմի վերջին հայտարարությունները Հայաստանի և Ադրբեջանի միջև հանդիպումների անցկացման հնարավորություն չեն թողնում: Ադրբեջանական լրատվամիջոցներից մեկին տված հարցազրույցում այս մասին ասել է այդ երկրի ԱԳ նախկին նախարար Թոֆիկ Զուլֆուղարովը:
Ըստ նրա՝ մինչև պաշտոնապես չհերքվեն Ստեփանակերտում ՀՀ վարչապետ Նիկոլ Փաշինյանի հնչեցրած հայտարարությունները, Ադրբեջանն այդ հանդիխումների նպատակահարմարությունը չի տեսնում:
«Ի՞նչ կտա մեզ Հայաստանի և Ադրբեջանի ԱԳՆ ղեկավարների սպասվող հանդիպումը: Այն մեզ միայն կվնասի: Մենք փաստացի ստորագրում ենք բանակցությունների օրակարգի տակ, որ պատրաստ ենք քննարկել՝ ինչ ասես, այդ թվում՝ հայերի կողմից հայտարարված «միացում» գաղափարը: Երկրորդ՝ մենք գնում ենք բանակցային գործընթացի իմիտացիայի»,- ասել է նախկին պաշտոնյան: Նա հավելել է, որ «միացում» գաղափարի մասին բարձրաձայնելով՝ Փաշինյանը, փաստորեն, այն դարձրել է Երևանի քաղաքականության մաս:
«Եթե Ադրբեջանը համաձայնի բանակցություններ վարել, Բաքուն, փաստորեն, կընդունի այդ օրակարգը: Բաքուն չպետք է մասնակցի ԱԳՆ ղեկավարների առաջիկա հանդիպմանը»,- ասել է Թոֆիկ Զուլֆուղարովը: Ավելի վաղ էլ Ադրբեջանի ԱԳՆ-ն հայտարարություն էր տարածել Հայաստանի ԱԳ նախարար Զոհրաբ Մնացականյանի ելույթի հետ կապված՝ նշելով, որ ՀՀ ղեկավարությունը «գիտակցաբար ղարաբաղյան հակամարտության սրացման է գնում»:
Ադրբեջանական արտաքին քաղաքական գերատեսչությանը դուր չի եկել ՀՀ դիվանագիտական ներկայացուցչությունների ղեկավարների հավաքի ժամանակ Մնացականյանի հայտարարությունը, որ «Ադրբեջանն իր անփոփոխ հայատյաց քաղաքականությամբ շարունակում է մնալ Արցախի ժողովրդի գոյության սպառնալիք»:
