Տեղեկություններ ունեմ, որ Աշոտ Արսենյանը և «Լիդիանը» խրախուսում են Ամուլսարի դեմ պայքարը. Հովիկ Աղազարյան․ ՏԵՍԱՆՅՈՒԹ

Factor.am-ի հարցազրույցը ՀՀ ԱԺ «Իմ քայլը» խմբակցության անդամ Հովիկ Աղազարյանի հետ

-Ձեր կարծիքով՝ ինչո՞ւ Ամուլսարի շուրջ աղմուկը չի դադարում։

-Աղմուկը չի դադարում, որովհետև, իմ խորին համոզմամբ, կան ուժեր։ Իհարկե, նրանք, որոնք դեմ են Ամուլսարի շահագործմանը, նրանց մեծ մասը դա անում է անկեղծ մղումներով՝ մտածելով երկրի մասին, մեր Հայրենիքի մասին, մեր բնության  մասին։ Շատերը կան, որոնք իմանալով կամ չիմանալով՝ օգտագործվում են որոշ ուժերի կողմից, որոնք հետապնդում են շահադիտական նպատակներ։

-Ի՞նչ ուժեր են դրանք։

-Դե՝ հիմա շատ դժվար է անուններ տալ, բայց ես տեղեկատվություն ունեմ, որ Արսենյանը՝ Ջերմուկի տերը, հանքային ջրերի տերը, որոշակի իմաստով խրախուսում է ցուցարարներին, խրախուսում է ակտիվիստներին, որպեսզի իրենք այդ հարցը բարձրացնեն։

-Այսինքն՝ խոսքը հանքը չշահագործելու մասին է, շահագործմանն ընդդիմանալու…

-Այո՛, ընդդիմանալու հարցն է։ Բայց նույն Արսենյանը (Աշոտ Արսենյան – «Ջերմուկ գրուպ» ՓԲԸ հիմնադիր նախագահ – խմբ.), երևի թե, պատգամավոր եղած ժամանակ էր, որ երբ հանքի բացման հարցն էր քննարկվում, ինքը չի ընդդիմացել։ Չի ընդդիմացել ինչո՞ւ։ Թողնենք այդ հարցի պատասխանը ուրիշներին։ Ես տեղեկատվություն ունեմ նաև, որ «Լիդիան» կազմակերպությունն ինքն է խրախուսում իր դեմ պայքարը, որովհետև ինչ-ինչ պատճառներով պատրաստ չէ հանքի շահագործմանը և փորձում է դրա պատասխանատվությունը գցել Հայաստանի Կառավարության վրա և նպատակ է հետապնդում, եթե չեմ սխալվում, պայմանագրով նախատեսված մոտավորապես 700 միլիոնի տույժ-տուգանքը ստանալ և շատ բարեհաջող դուրս գալ իրավիճակից։ Այդպիսի կարծիք էլ ունեմ։

-Այսինքն՝ կարելի՞ է ենթադրել, որ «Լիդիանը» ֆինանսավորում է իր դեմ շարժումը։

-Ես ունեմ այդպիսի տեղեկատվություն, կդժվարանամ հաստատել, բայց եթե ես վստահություն ունենայի դա անելու, ապա որպես հանցագործություն՝ կարող էի ներկայացնել և համապատասխան ընթացակարգով շարժվել առաջ։ Բայց իմը տեղեկատվական իրավիճակ է։

-Ինչո՞ւ, ըստ Ձեզ, հեղափոխություն իրականացրած վարչապետին չի հաջողվում ժողովրդին համոզել Ամուլսարի շահագործման հարցում։

-Ես համաձայն չեմ, որ չի հաջողվում։ Կարող է և հաջողվի, որովհետև դա մեկ օրվա գործընթաց չէ, և նաև մեր քննարկման ժամանակ վարչապետը միտք է հայտնել, որ չի բացառվումմ, որ որոշ ժամանակ անց նոր հանգամանքներ ի հայտ գալու դեպքում հանքը չշահագործվի։ Այսօրվա ունեցած տեղեկատվության, փորձաքննության և ՔԿ կատարած աշխատանքի արդյունքում մենք հիմք չունենք, որ կասեցնենք հանքի շահագործումը։

Հարցազրույցն ամբողջությամբ՝ տեսանյութում:

Մհեր Արշակյան