05.07.2026 | 01:14
«Ուիմբլդոն». Կարեն Խաչանովը դուրս է մնացել պայքարից
Խոսվում է 100 տոննա ոսկու մասին, բայց բացառված չէ, որ շահագործելուց հետո ծավալները փոփոխություն կրեն. Արտակ Մանուկյան․ ՏԵՍԱՆՅՈՒԹ
Քաղաքականություն
23.08.2019 | 17:53
Factor.am–ի հարցազրույցը ՀՀ ԱԺ «Իմ քայլը» խմբակցության պատգամավոր, ֆինանսավարկային և բյուջետային հարցերի մշտական հանձնաժողովի նախագահի տեղակալ Արտակ Մանուկյանի հետ
–Պարո՛ն Մանուկյան, այսօր վարչապետը Ջերմուկում է, հանդիպում է տեղացիներին, լսում նրանց: Ինչ եք կարծում՝ հնարավո՞ր է այս այցի արդյունքում դիրքորոշման փոփոխություն լինի:
-Հարցը, իրոք, շատ կարևոր է՝ հատկապես հետևանքերի տեսանկյունից: Կարևոր է, որ բոլոր ռիսկերը հավասարակշռվեն, պետք է շատ տեղեկացվածություն ձեռք բերվի որոշում կայացնելուց առաջ, որովհետև ինչ որոշում էլ լինի, առաջ է բերելու հետևանքներ՝ ծախսերի տեսանկյունից։
–Կարծում եք, որ Կառավարությունը բավարար ինֆորմացիա չունի՞։
-Ճիշտն ասած՝ ես իրավասու չեմ Կառավարության փոխարեն պատասխանել, բայց այստեղ շատ կարևոր է վարչապետ-քաղաքացի շփումը: Դա այն մշակույթն է, որ նոր իշխանությունները բերել են՝ անձնապես լսել, քննարկել փաստարկները, որովհետև սա այն հարցն է, որ տեղեկացված որոշում կայացնես։ Եթե ուզենաս մանիպուլացնել, սա այն հարցն է, որ հնարավոր կլինի մանիպուլացնել։
–Հանդիպման ընթացքում տվյալներ էր հնչեցնում Վայոց ձորի նախկին մարզպետ Էդգար Ղազարյանը՝ նշելով, որ ամռանը հանքի շահագործման ընթացքում օրական 10-25 պայթեցում է լինելու, 25 տոննա փոշի: Այս տվյալները հայտնի՞ էին իշխանությանը։
-Եթե մենք ռիսկերը դիտարկում ենք, ապա դա նորություն չէր: Բայց այդ մասին հրապարակային նշելը և խոսելը՝ նաև ամառային սեզոնի մասին, կարող է մասնագիտական քննարկման առիթ դառնալ։ Մեկ բան, սակայն, չպետք է մոռանալ, որ 2017 թվականին այդ ռիսկերին ծանոթ լինելով՝ կայացվել է հանքը շահագործելու քաղաքական որոշում: Եթե այդ որոշումը լիներ նոր, այդ թույլտվությունը չէր ստացվի:
–Ի՞նչն է խանգարում հրաժարվել, ինչո՞վ է կաշկանդված Կառավարությունը։
– Հետևանքները: Նույն կերպ կարող ենք ասել՝ ինչն է խանգարում պետական պարտքը, որը կուտակվել է նախկին կառավարությունների օրոք և ծախսվել է անարդյունավետ, ի՞նչն է խանգարում հրաժարվել պետական պարտքից, ասել՝ չենք մուծում։
–Իսկ ոսկու պաշարների մասով ի՞նչ տվյալներ ունեք:
-Ես անձամբ տիրապետում եմ այն նույն տվյալներին, ինչ հանրությունը: Եթե այժմ խոսվում է 100 տոննա ոսկու պաշարների մասին, բացառված չէ, որ շահագործվելուց հետո այս ծավալները փոփոխություն կրեն:
-Հայտնի է, որ հարցի առնչությամբ ձեր խմբակցությունում անհամաձայնություն կա, ինչի՞ դա կհանգեցնի: Հնարավո՞ր է՝ խմբակցությունը պառակտվի։
-Թիմի կայացման համար առաջին գրավականն այն է, որ թիմը կայանա բարդ խնդիրներ լուծելուց։ Եթե հանքի շահագործման որոշում լինի, կարծում եմ՝ առնվազն մոնիթորինգ իրականացնելու շրջանակում դեմ արտահայտվողները մշտական ռեժիմով, այդ թվում՝ տեղում մոնիթորինգի միջոցով համոզվեն, որ այն ռիսկերը, որոնց մասին բարձրաձայնում են, ի չիք են դարձել։
Հարցազրույցն ամբողջությամբ՝ տեսանյութում։
Շողիկ Գալստյան
