Քաղաքականություն
21.08.2019 | 11:27
ՌԴ Քննչական կոմիտեի աշխատակիցները Խաչատուրյան քույրերի պաշտպաններին են հանձնել նրանց հոր՝ Միխայիլ Խաչատուրյանի նկատմամբ դուստրերին խոշտանգելու և սեռական ոտնձգության համար քրեական գործի հարուցումը մերժելու մասին որոշումը՝ կապված նրա մահվան հետ: ՏԱՍՍ-ի փոխանցմամբ՝ այս մասին հայտնել է իրենց հոր սպանության մեջ մեղադրվող Խաչատուրյան քույրերի փաստաբան Սերգեյ Պարշինը:
Միաժամանակ, այս արարքների փաստը քննությունը հաստատել է: Փաստաբանների կարծիքով՝ սա աղջիկներին հնարավորություն կտա ապացուցել, որ գործել են անհրաժեշտ ինքնապաշտպանության սահմաններում, և նրանց նկատմամբ քրեական հետապնդումը պետք է դադարեցվի:
«Նախաքննությունն ապացուցել է Խաչատուրյան քույրերի ցուցմունքների ճշմարտացիությունը: ՌԴ ՔԿ աշխատակիցները պաշտոնապես Խաչատուրյան քույրերի փաստաբաններին են ներկայացրել նրանց հոր՝ Միխայիլ Խաչատուրյանի նկատմամբ քրեական գործի հարուցումը մերժելու մասին որոշումը: Դրա տեքստից պարզ է դառնում, որ քննիչները պարզել են աղջիկների նկատմամբ բարոյական և սեռական բռնությունը, իսկ քրեական գործի հարուցումը մերժելը սպասելի էր՝ կապված կասկածյալի մահվան հետ»,- ասել է փաստաբանը:
Անցյալ տարվա հուլիսին 57-ամյա Միխայիլ Խաչատուրյանի սպանության փաստով հարուցված քրեական գործի նախաքննությունն ավարտվել է: Մեղադրյալներն ու նրանց փաստաբանները ծանոթանում են գործի նյութերին:
Խաչատուրյան քույրերին մեղադրում են նախնական համաձայնությամբ հորը սպանելու մեջ: Միաժամանակ, մեղադրանքում նշվում է, որ քույրերի գործողությունների պատճառը տուժող Միխայիլ Խաչատուրյանի գործողություններն են եղել: Փաստաբանները պնդում են, որ աղջիկներն այդ քայլին դիմել են, քանի որ տարիներ շարունակ բռնության են ենթարկվել հոր կողմից:
