Եթե տարվա բոլոր եղանակներին Ջերմուկ եկող ցիանով բեռնատարը շրջվի, ի՞նչ է լինելու. Նազելի Վարդանյանը հակադարձում է վարչապետին. ՏԵՍԱՆՅՈՒԹ

Factor.am–ի հարցազրույցը իրավաբան, էկոլոգ Նազելի Վարդանյանի հետ

– Տիկի՛ն Վարդանյան, նախ՝ վարչապետի որոշման հետ կապված Ձեր գնահատականը: Երեկ նա ծավալուն ելույթով փորձեց հիմնավորել հանքի շահագործման հետ կապված Կառավարության որոշումը: Բացի այդ՝ երեկ նրա հետ հանդիպմանը Դուք ևս ներկա էիք, իրարամերժ հայտարարություններ հնչեցին, ինչո՞ւ:

– Երեկվա հանդիպումից տպավորությունն այնպիսին էր, որ հրավիրել են այն մարդկանց, որոնք պետք է լսեին, թե ինչ որոշում է կայացրել Կառավարությունը։ Հանդիպմանը պետք է վարչապետը որոշումը ներկայացներ և այն հիմնավորեր, սակայն բնապահպաններից մի քանիսը ելույթ ունեցան, այդ թվում՝ ես, մի քիչ խառնաշփոթ առաջացավ, թույլ չէր տրվում մեր մտքերը մինչև վերջ ավարտել։

– Ո՞վ էր խանգարում։

– Վարչապետը երեք անգամ ինձ ընդհատել է։ Պետք է ասեմ, որ ինձ ոչ միայն այն 18 ջերմուկցիներն ու գնդեվազցիներն էին լիազորել, այլ մեկ օր առաջ Ջերմուկի 100 բնակիչ դիմել և խնդրել էին՝ իրենց տեսակետը ես ներկայացնեմ։ Վարչապետն ավելի շատ մեզ ընդդիմանում էր, քան փորձում հասկանալ։

– Նիկոլ Փաշինյանը երեկ հավաստիացնում էր, որ շրջակա միջավայրի վրա որևէ բացասական ազդեցություն չի կարող լինել:

– Դա գետ չի, որ փակեն, վտակ չի… հրաբխային ապառներ են, ստորգետնյա հոսքեր են, որոնք անձրևի և ձնհալի տեսքով թափանցելու են ստորգետնյա և վերգետնյա ջրավազան: Այդ ամենին վերահսկողություն չկա։

– Այսինքն՝ այդ վստահեցումներն արժանահավատ չե՞ն։

– Ես մի քանի հարց ունեմ վարչապետին: Օրինակ, եթե տարվա բոլոր եղանակներին Նոյեմբերյանի սահմանից մինչև Ջերմուկ եկող ցիանով բեռնատարը շրջվի, ի՞նչ է լինելու, օրական 10-15 վթար ենք ունենում: Այդ նույն «Լիդիան» ընկերությունը մի քանի վթար է ունեցել, ո՞վ է երաշխավորում, որ նման մի մեքենա էլ՝ ցիանով բարձած, չի շրջվի։ Ո՞նց կարելի է այդպիսի հայտարարություններ անել։

Հարցազրույցն ամբողջությամբ՝ տեսանյութում:

Շողիկ Գալստյան