«ՔՊ-ի մարզպետները ժողովրդի վրա սուբվենցիա ծախող են». Էդմոն Մարուքյան

ԱԺ «Լուսավոր Հայաստան» խմբակցության ղեկավար Էդմոն Մարուքյանը Ֆեյսբուքում Երևանի ավագանու «Լույս» խմբակցության ղեկավար Դավիթ Խաժակյանի հետ զրույցում անդրադարձել է ներքաղաքական անցուդարձին:

Մարուքյանի կարծիքով՝ BBC-ի ռուսական ծառայության հոդվածի հրապարակումը պատահական չէր:

«Կարծում եմ՝ սա նպատակադրված ինֆորմացիա էր, որ եթե անգամ մեղադրյալների չկարողանան ներգրավվել, ապա գոնե հանրությունը իմանա, թե ինչ է կատարվել։ Բայց մարդիկ սկսելու են չհավատալ իրավապահ մարմիններին, ասելու են՝ տեսեք՝ բոլորս իմացանք, որ Օգանովսկին է կրակելու հրաման տվել, բայց շարունակում է չդատվել, ինչո՞ւ։ Սա կնշանակի, որ հանրությունը սկսելու է չհավատալ հեղափոխությունից հետո եղած իրավական համակարգին, նմանատիպ դեպքերը ուղիղ հարված են իրավունքի գերակայությանը, հեղափոխությունից հետո վերականգնվող իրավական համակարգին»,- ասել է նա:

Մարուքյանն ու Խաժակյանն անդրադարձել են տարբեր թեմաների, այդ թվում՝ համայնքների խոշորացմանն ու մարզպետների աշխատանքին՝ այն կոչելով «մարզպետական համակարգ»:

«Եթե այդ համակարգը մնա, ապա մյուս ընտրությունների ժամանակ «Իմ քայլի» կամ «Քաղաքացիական պայմանագրի» մարզպետներն ունենալու են լուրջ դերակատարում։ Ոչ թե նրա համար, որ իրենք ռեյտինգով տղերք են, այլ իրենք ժողովրդի վրա սուբվենցիա ծախող են, կասեն՝ վարչապետի հետ այս սուբվենցիան բերեցինք ու այստեղ ասֆալտ արեցինք, ուստի պետք է ընտրեք մեզ։ Դե՝ մեր ժողովուրդն էլ անշնորհակալ չէ, դրա համար էլ կընտրեն, իրենք հո չե՞ն մտածի, թե այդ ամենն արվել է մարդկանցից հավաքած հարկերի հաշվին։ Այս ամենը ժողովրդի վրա ծախում են՝ որպես իրենց կողմից տրվող բարիք։ Հանրապետականն այդպես է պահել մարզպետական համակարգը, և այսօրվա իշխանությունը նպատակ չունի այդ արատավոր ինստիտուտից հրաժարվել։ Բոլոր իրավապահներն այսօր ենթարկվում են մարզպետներին, ասում են՝ Սահմանադրություն փոխենք, խոսակցություն կա՞ մարզպետների ինստիտուտը վերացնելու մասին, այն ներկայիս իշխանություններին «դզել» է»,- ասել է Մարուքյանը։

«Լուսավոր Հայաստան» խմբակցության ղեկավարի պնդմամբ՝ եթե ներկա իշխանությունը շարունակի «հագնել Սերժ Սարգսյանի համար կարված կոստյումը», ապա իրենք դրա դեմ պայքարելու են, քանի որ չեն կարող մտածել, թե «Սերժն այն լավ չէր հագնում, իսկ Նիկոլը լավ է հագնում»:

Զրույցն ամբողջությամբ՝ այստեղ