Մշակույթ
06.08.2019 | 16:31
Գյումրու Վարդան Աճեմյանի անվան դրամատիկական թատրոնը 154-րդ թատերաշրջանը բացում է երեք նոր ներկայացմամբ: Դրանցից մեկը «Երկնագույն շան աչքերը» ներկայացումն է, որը բեմադրվում է Գաբրիել Գարսիա Մարկեսի համանուն պիեսի հիման վրա: Այս ներկայացումը Գյումրու թատրոնում արդեն բեմադրվել է, բայց, թատրոնի տնօրեն Լյուդվիգ Հարությունյանի խոսքով, ստեղծագործական խմբի ցանկությամբ որոշվել է ներկայացումը կրկին ընդգրկել խաղացանկում՝ դերասանական կազմի փոփոխությամբ:
«Աղջկա դերակատարի համար հրավիրվել է դերասանուհի Իննա Խոջամիրյանը, իսկ տղայի դերակատարը լինելու է Գյումրու թատրոնի դերասան Արսեն Միքայելյանը: Դերասանները և ռեժիսորը՝Ռաֆայել Ասատրյանը, որոշել են ներկայացմանը երկրորդ կյանք տալ: Նրանք, ովքեր տեսել են այս ներկայացումը, սեպտեմբերին կտեսնեն արդեն այլ մեկնաբանությամբ, այլ խաղով»,- Factor.am-ի հետ զրույցում ասաց դրամատիկական թատրոնի տնօրենը:
Նրա խոսքով՝ թատրոնը կադրերի խնդիր չունի, բայց արդեն մի քանի տարի որպես նորամուծություն կիրառում է դերասաններին Գյումրու թատրոն հրավիրելու պրակտիկան:
«Իննայի հետ թատրոնը լավ բարեկամ է, նա միշտ գալիս էր մեր ներկայացումները դիտելու, և ռեժիսորի կողմից առաջարկ եղավ՝ փորձել Իննային դրամատիկ ժանրում»,- ասաց տնօրենը:
Մարկեսի «Երկնագույն շան աչքերը», հայերենից բացի, կներկայացվի նաև անգլերենով։
Պրեմիերան սեպտեմբերի 25-ին է:
Նարեկ Կիրակոսյան
