Թեղուտն այս պահին աշխատում է իր ամբողջ ծավալով, աշխատակիցները խնդիր չունեն. Լոռու մարզպետը՝ այսօր կազմակերպված ակցիայի մասին

«Թեղուտի վերաբացում» նախաձեռնությունն այսօր երթ էր կազմակերպել, ակցիայի մասնակիցների խոսքով՝ հանուն մեր տարածաշրջանի ամենամեծ աշխատատեղի պահպանման:

Նախաձեռնության անդամները նշում են, որ փորձ է արվում արհեստականորեն խոչընդոտել «Թեղուտի» աշխատանքը և այն, ինչ ներկայացնում են միջազգային փորձագետները պոչամբարի վիճակի մասին, իրականությանը չի համապատասխանում։ Ըստ ակցիայի մասնակիցների՝ ապատեղեկատվություն է այն, թե «Թեղուտի» պոչամբարը ճաք չունի։

Նշենք, որ ավելի վաղ «Թեղուտ» ՓԲԸ-ի կողմից տարածված հաղորդագրության համաձայն՝ փորձ է արվում մարդկանց թյուրիմացության մեջ գցել՝ հանքի աշխատանքների դադարեցման և շրջակա համայնքների բնակչությանը անելանելի ծանր սոցիալական վիճակի մեջ գցելու փաստով:

Հիշեցնենք, որ 2018թ. ընկերությունը դադարեցրել է գործունեությունը պոչամբարի հետ կապ չունեցող պատճառով՝ երկու շաբաթով կանգնելով պլանային-վերանորոգման աշխատանքների (համաձայն գլխավոր տնօրենի 2018թ. հունվարի 12-ի հրամանի), իսկ 2018թ. հունվարի 30-ին աշխատողներին ծանուցել է աշխատանքային պայմանագրերը գործատուի նախաձեռնությամբ լուծելու մասին՝ միաժամանակ չսպասարկելով VTB բանկի՝ շուրջ 380 մլն դոլարի չափով վարկային պարտավորությունը:

«Թեղուտի վերաբացում» նախաձեռնության անդամներն այսօրվա ակցիայի ժամանակ հիշեցրեցին «Մեխանոբր Ինջինիրինգ» ընկերության կողմից 2018թ. իրականացված Թեղուտի պատվարի կայունության հետազոտության արդյունքների մասին, որոնք, ըստ նրանց, ցույց են տալիս, որ նույնիսկ պատվարի մարմնի ջրերի մակարդակը բնութագրող կորի՝ բարձր լինելու դեպքում ստատիկ վիճակում պոչամբարի պատվարին վտանգ չի սպառնում:

Նշենք, որ այսօրվա քայլերթին մասնակցում էին նաև Ալավեդու պղնձաձուլարանի նախկին աշխատակիցները:

Ակցիայի վերաբերյալ Լոռու մարզպետ Անդրեյ Ղուկասյանը Factor.am-ի հետ զրույցում ասաց, որ չի հասկանում, թե ինչ պահանջով են երթ անցկացնում, քանի որ Թեղուտի աշխատակիցների հարցը լուծված է։

«Թեղուտն այս պահին աշխատում է իր ամբողջ ծավալով՝ 1.000 աշխատակցով։ Թեղուտի աշխատակիցները խնդիր չունեն այս պահին, նրանց խնդիրը լուծված է: Խնդիր ունենք Ալավերդու պղնձաձուլարանի աշխատակիցների հետ կապված, ինչի ուղղությամբ էլ մարզպետարանը քայլեր է ձեռնարկում: Մենք Թեղուտի ղեկավարությանն ենք ներկայացրել Ալավերդու պղնձաձուլարանի՝ աշխատանքից զրկված 50 անձանց ցուցակ, որպեսզի նրանց կարողանան Թեղուտում աշխատանքի ընդունել: Ալավերդու պղնձնաձուլարանում էլ այս պահին կա արտադրություն՝ մոտ 60 հոգանոց աշխատակազմով, որոնց թիվը նախատեսվում է հասցնել 120-ի»,- ասաց Լոռու մարզպետը։

Աղավնի Սուքիասյան