Երբ քաղաքապետը կապալառուի հետ անցնում է փոխհրաձգության, ուրեմն բանակցությունները ձախողված են․ Դավիթ Խաժակյան․ ՏԵՍԱՆՅՈՒԹ

Երբ մենք ասում ենք՝ լուծեք «Սանիթեք»-ի հետ պայմանագիրը, մեր գործընկերները չեն հակադարձում նրանով, որ դա իրավաբանորեն անհնար է, ասում են՝ եթե դա իրականացնենք, կառաջանա վակուում, և ով պետք է իրականացնի աղբահանությունը: Երևանի աղբահանության խնդիրներին նվիրված քննարկման ժամանակ այս մասին ասաց ավագանու «Լույս» խմբակցության ղեկավար Դավիթ Խաժակյանը:

««Սանիթեք»-ը երկու կնքված պայմանագիր ունի: Իրավաբանորեն դրանք երկու տարբեր անձինք են, բայց դե ֆակտո դա մեկ կազմակերպություն է: Մեր առաջարկն այն է, որ լուծվեր պայմանագրերից մեկը, «Սանիթեք»-ին առաջարկվեր իր ամբողջ ռեսուրսը տեղակայել քաղաքի մի կեսի համար, որի համար, թերևս կբավականացնեին և՛ մեքենաները, և՛ աղբամանները, իսկ մյուս կեսի համար աղբահանության պարտավորությունը ստանձներ համայնքային հիմնարկը: Սա, կարծում եմ, իրատեսական կլիներ իրականացնել, այդ թվում՝ «Սանիթեք»-ի հետ համագործակցության ձևաչափում»,- ասաց Դավիթ Խաժակյանը:

Նա կարծում է, որ «Սանիթեք»-ին ուղղված քաղաքապետի հրապարակային մեղադրանքները նույնպես վնաս հասցրեցին քաղաքին:

«Երբ քաղաքապետը կապալառուի հետ անցնում է հրապարակային փոխհրաձգությունների, նշանակում է, որ բանակցությունները, փոխադարձ շփումները ձախողված են: Մենք կարող ենք մեր գործընկերների հետ՝ որպես ավագանու անդամներ, որպես քաղաքական մարմնի ներկայացուցիչներ, հանրային բանավեճ ունենալ, դա նորմալ է: Բայց երբ քաղաքապետարանը, որպես պայմանագիր կնքող կողմ, կապալառուի հետ մտնում է հրապարակային վեճի մեջ, դա արդեն նորմալ չէ և ինչ-որ փուլում վնաս է տալու»,- ասաց Երևանի ավագանու անդամը:

Մանրամասները՝ տեսանյութում: