«Մինչև մեր տնտեսությունը չաշխատի, գազի գնի իջեցում չի լինի»․ պատգամավորները գազի սակագնի հնարավոր թանկացման մասին. ՏԵՍԱՆՅՈՒԹ

«Հայաստանում գազի սակագինն առաջիկայում չբարձրացնելու տարբերակ կա»,- կարծում է ԲՀԿ-ական պատգամավոր Միքայել Մելքումյանը

«Մենք ակնկալում ենք, որ, քանի որ սակագինը ՀԾԿՀ-ն է հաստատում, ամեն ինչ պետք է անի Կառավարությունը, որ գազի՝ սպառողի սակագինը չփոփոխվի: Առանց այն էլ թանկ գին է, բարձր գին է: Եվ բոլոր տիպի այդ շեղումները, որ սահմանի վրա կլինեն, պետք է «Գազպրոմ Արմենիա»-ի ծախսերի վերաբաշխման հաշվին լինի»,- ասաց ԱԺ «Բարգավաճ Հայաստան» խմբակցության անդամը:

Պատգամավորը նկատեց, որ դեռ պարզ չէ՝ ռուսները սահմանի վրա կբարձրացնե՞ն գազի սակագինը։ Սակայն, ըստ նրա, Ռուսաստանը Հայաստանին մատակարարվող գազից մինչև 2042 թվականը պետք է ստանա տարեկան պարտադիր 9 տոկոս շահութաբերություն, որը կարելի է իջեցնել:

«Երբ բնական մենաշնորհ է, «Գազպրոմ»-ը և դու ունես կայուն շուկա, այսինքն՝ իրացման խնդիր չունես… Երբ որ դու որևէ իրացման խնդիր չունես, ուրեմն պետք չի, որ շահութաբերությունը բարձր լինի»,- ասաց պատգամավորը:

Ըստ նրա՝ կա նաև գազի սակագինն իջեցնելու տարբերակ, սակայն դա արդեն ռուսներից ավելի քիչ է կախված, քան մեզանից:

«Մինչև մեզ մոտ չաշխատի տնտեսությունը, հատկապես՝ արդյունաբերությունը, և 2 միլիարդ խորանարդ մետրը մենք չդարձնենք 4-4.5 միլիարդ, գազի գնի իջեցում չենք կարող ակնկալել։ Պետք է ավելացնենք գազի սպառման ծավալները»,- նշեց պատգամավորը։

Միքայել Մելքումյանը նկատեց, որ սակագինը բարձրացնելու՝ ռուսների քաղաքականությունն այսօր չի կարելի պայմանավորել այն մտածողությամբ, որ Հայաստանի ու Ռուսաստանի իշխանություններն այսօր լավագույն հարաբերությունները չունեն:

«Էդ լավագույն հարաբերություններ չունենալը որտե՞ղ է արձանագրված, ո՛չ իրավական է, ո՛չ չիրավական է, էդ ի՞նչ է փոխվել, ռազմաբազան կա, սահմանը պահում են, էն ինչ-որ ԶԼՄ-ները կամ մյուսներն անում են, էդ ընկալումն ա էդպիսին»,- ասաց ԱԺ «Բարգավաճ Հայաստան» խմբակցության անդամը:

Իշխանական պատգամավոր Հայկ Գևորգյանը հաշտ է այն մտքի հետ, որ առաջիկայում կարող է բարձրանալ գազի սակագինը, թեպետ ինքն այդպիսի տեղեկություններ չունի:

«Կողմնակից եմ այն սկզբունքին, որ եթե, այնուամենայնիվ, պիտի թանկանա, ուրեմն պիտի թանկանա, և ՀՀ-ն, ինչպես նախկինում է եղել, երբեք գազի գնի համար իր սուվերենությունից չպետք է գոնե մեկ միլիմետր հետ կանգնի»,- ասաց «Իմ քայլը» խմբակցության անդամը:

Ըստ տնտեսագետ-պատգամավորի՝ միայն Հանրային ծառայությունները կարգավորող հանձնաժողովը պետք է զբաղվի՝ հասկանալու, թե ինչ տարբերակներ կան, որ սակագինը չբարձրանա:

«Կարծում եմ՝ կզբաղվի դրանով, որովհետև, տեսեք, 15 դոլարով անցյալ տարի թանկացավ, դա սպառողների վրա չանդրադարձավ, որովհետև կլանեց «Գազպրոմ Արմենիա»-ն իր աշխատանքի արդյունավետության ավելացման շնորհիվ։ Հնարավոր է՝ այսօր էլ նման ռեսուրսներ լինեն»,- կարծիք հայտնեց Հայկ Գևորգյանը:

Այնուամենայնիվ, ըստ պատգամավորի, այսպես թե այնպես, 2025 թվականից ԵՏՄ բոլոր երկրներում գործելու է գազի և էլեկտրաէներգիայի ընդհանուր սակագին։ Միակ հնարավորությունը՝ փոխհատուցելու ռուսական գազի թանկ սակագնին, պատգամավորը համարում է իրանական գազը, բայց դա էլ կախված է ոչ միայն մեզնից, այլև աշխարհաքաղաքական վիճակներից։

Մանրամասները՝ տեսանյութում:

Մհեր Արշակյան