Եզդի կանանց գերությունից ազատելու և եզդիների ցեղասպանության հեղինակներին պատժելու ուղղությամբ քայլեր չեն կատարվում․ Սաիդ Ավդալյան

Իրաքի Շանգալ նահանգի եզդիների ցեղասպանության հետևանքները շարունակվում են․ եզդի կանանց գերությունից ազատելու և այդ ցեղասպանության հեղինակներին պատժելու ուղղությամբ քայլեր չեն կատարվում. այս մասին այսօր հրավիրված մամուլի ասուլիսի ժամանակ ասաց «Հայաստանի երիտասարդ եզդիների ասոցիացիա»-ի նախագահ Սաիդ Ավդալյանը՝ նշելով, որ այս ամենի արդյունքում այսօր կես միլիոնից ավելի եզդի փախստական կա ողջ աշխարհում։

Նրա խոսքով՝ ցեղասպանության հետևանքով եզդիները հայտնվել են հումանիտար աղետի առաջ, թեև ՄԱԿ-ի և գերտերությունների կողմից տրամադրվում է տարատեսակ օժանդակություն։

«Միջազգային կազմակերպությունների, գերտերությունների կողմից օգնություն է ուղարկվել եզդիներին, սակայն, քանի որ եզդիները չունեին համակարգող կազմակերպություններ, այդ օգնությունը համակարգելու և բաժանելու համար, այդ ամբողջ գումարը փոխանցվեց Հյուսիսային Քրդստանի իշխանությանը, որոնք էլ արևմուտքի երկրների աչքերին թոզ փչեցին, ու այդ գումարները յուրացրեցին։ Արդյունքում եզդիների համար չծախսվեց այդ օգնությունից ոչ մի լումա»,- ասաց  Ավդալյանը՝ հիշեցնելով ՄԱԿ-ի կողմից տրամադրված օգնություններից մեկը։

«ՄԱԿ-ի կողմից եզդիներին տրամադրվել են վրաններ, բայց՝ հինգ տարի առաջ: Դրանք  արդեն հնամաշ են, ոչ ջրակայուն, դյուրավառ են: Ցրտաշունչ ձմռան պայմաններում, այդ տնակներում ապրելով, մարդիկ լուրջ վտանգների առաջ են կանգնում: Եզդիներից շատերն են ցանկանում վերադառնալ իրենց հայրենիք՝ Շանգալ, սակայն այստեղ էլ խնդիրներ կան. Շանգալի ենթակառուցվածքները պայթեցվել են, տները քանդվել են»,- ասաց Ավդալյանը:

Վերջինս նաև նշեց, որ  եզդիների ցեղասպանության զոհերի կոնկրետ թիվ չեն կարող հայտնել, որովհետև ամեն օր հայտնաբերվում են եղբայրական գերեզմաններ, որտեղ կան մեծ թվով սպանված եզդիների մասունքներ:

«ՄԱԿ-ի փորձագիտական և հետազոտական խումբն իրականացնում է մասունքների հայտնաբերումը, դրանց նույնականացումը»,- ընդգծեց նա՝ շեշտելով, որ իրականացվում է նաև մշակութային ցեղասպանություն և հինգ տարվա ընթացքում արձանագրվել է բազմաթիվ եզդիական սրբավայրերի, մշակութային արժեքների ոչնչացում հենց «Իսլամական պետության» զինյալների կողմից:

«Արդեն 60-ից ավելի եզդիական սրբավայրեր են պայթեցվել: Որոշները վերականգնվել են, սակայն չունեն նախկինի տեսքը: ԱՄՆ-ի կառավարությունը ֆինանսական օգնություն է տրամադրել վնասված հուշարձաններն ինչ-որ ձևով վերականգնելու համար»,- ասաց նա:

Հիշեցնենք, որ Շանգալի եզդիների ցեղասպանությունը տեղի է ունեցել 2014 թվականի օգոստոսի 2-ի լույս 3-ի գիշերը:

Աղավնի Սուքիասյան