30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Սիրիական ընդդիմության հետ զինադադարի համաձայնություն է ձեռք բերվել
Քաղաքականություն
02.08.2019 | 14:30
Սիրիական ընդդիմության պատվիրակությունը Նուր Սուլթանում անցկացված բանակցություններում համաձայնել է Իդլիբի մոտ զինադադարի: ՏԱՍՍ-ի փոխանցմամբ՝ այս մասին լրագրողներին ասել է Ղազախստանի ԱԳՆ Ասիայի և Աֆրիկայի բաժնի ղեկավար Երժան Մուկաշը:
«Զինադադարի համաձայնություն է ձեռք բերվել: Հասկանալի է, որ Իդլիբի մոտ ահաբեկիչներ են մնացել, որոնք չեն հետևի հրադադարին, բայց այստեղ ներկա ընդդիմությունը համաձայնել է զինադադարի»,- ասել է նա:
Սիրիական հեռուստատեսությունը հինգշաբթի երեկոյան հայտնել է, որ կառավարությունը Իդլիբում հրադադարի մասին համաձայնություն է ձեռք բերել՝ պայմանով, որ իրականացվեն Սոչիի համաձայնությունները՝ զինյալները 20 կմ հեռանան ապառազմականացված գոտուց և այնտեղից դուրս բերեն ծանր հրետանին:
Մուկաշը հայտնել է նաև, որ սիրիական սահմանադրական հանձնաժողովում բոլոր թեկնածությունների վերջնական համաձայնեցման համար, հավանաբար, Նուր Սուլթանում լրացուցիչ հանդիպումների կարիք կլինի: «Նախկինում տարաձայնություններ կային սահմանադրական հանձնաժողովի կազմի հետ կապված, հիմա կառավարության և ընդդիմության ներկայացուցիչները փոխհամաձայնության են եկել»,- ասել է նա:
Ղազախ դիվանագետը հավելել է, որ մինչև տարեվերջ, հավանաբար, Նուր Սուլթանում Սիրիայի հարցով բարձր մակարդակով ևս 2-3 հանդիպում կանցկացվի:
