16.11.2024 | 22:58
«Մանկական Եվրատեսիլ – 2024»-ում հաղթեց Վրաստանը
Առողջապահական և աշխատանքի տեսչական մարմնի ղեկավարն ամփոփում է իր պաշտոնավարման ընթացքը․ ՏԵՍԱՆՅՈՒԹ
Քաղաքականություն
02.08.2019 | 12:32
Առողջապահական և աշխատանքի տեսչական մարմնի ղեկավար Էդգար Խուրշուդյանն այսօր հրավիրված մամուլի ասուլիսի ընթացքում ներկայացրեց իր պաշտոնավարման ընթացքի վերաբերյալ հաշվետվություն, որն ընդգրկում է մինչև այս տարվա հուլիսի 1-ն ընկած ժամանակահատվածը։
Նշենք, որ Խուրշուդյանին երկու շաբաթ առաջ Mulberry ծրագրի միջոցով ծանուցել են, որ օգոստոսի 1-ից ինքն ազատված է աշխատանքից։
Ըստ Խուրշուդյանի՝ 2018 թվականին տեսչական մարնում 4-4․5 անգամ ավելացել է հարուցված վարույթների թիվը և դա պայմանավորված է Առողջապահական և աշխատանքի տեսչական մարմնի աշխատանքի որակի փոփոխությամբ և արդյունավետությամբ։
«Ըստ ոլորտների՝ այդ վարույթների զգալի մասը վերաբերում է դեղերի շուկային։ Այստեղ ունեցել ենք խոշոր ներմուծողների հետ կապված վարույթներ, որոնց արդյունքում նշանակվել են բավականին մեծ տուգանքներ։ Ընդհանուր առմամբ, մեր տեսչական մարմնում իմ նշանակումից հետո տուգանքների չափը գերազանցում է 300 մլն դրամը, որի հիմնական մասը վերաբերում է դեղերի շուկային։ Մենք բավականին մեծ աշխատանք ենք կատարել նաև մայրուղիներին տեղակայված գազա-բենզալցակայանների սանհանգույցները բարվոք վիճակի բերելու ուղղությամբ։ Ուսումնասիրվել են 230-ից ավել գազալցական և վարչական վարույթներ են հարուցվել 90 տոկոսի դեպքում և այսօրվա դրությամբ մենք ունենք բավականին լավ ցուցանիշ ներկա վիճակում․ շատ տնտեսվարողներ կամ վերանորոգել են այդ սանհանգույցները, կամ եթե չեն ունեցել՝ կառուցել են»,- իր պաշտոնավարման ընթացքում իրականացրած աշխատանքների և արձանագրած ցուցանիշների վիճակագրությունը ներկայացրեց Խուրշուդյանը՝ ներկայացնելով նաև այլ ոլորտներում կատարած աշխատանքները։
Առողջապահական և աշխատանքի տեսչական մարմնի նախկին ղեկավարը վերջում հավելեց, որ այս մեկ տարվա ընթացքում տեսչական մարմինը բավականին օգտական գործունեություն է ծավալել ու դարձել առավել հայտնի։
Մանրամասները՝ տեսանյութում։
Աղավնի Սուքիասյան
