15.12.2025 | 09:31
Երևանի քաղաքապետարանի գործակարգավարական նիստը. ՈՒՂԻՂ
Գերմանիան հրաժարվել է մասնակցել Իրանի դեմ Հորմուզի նեղուցում ԱՄՆ-ի առաքելությանը
Քաղաքականություն
01.08.2019 | 16:35
Գերմանիան հրաժարվել է մասնակցել Իրանի դեմ Հորմուզի նեղուցում ԱՄՆ-ի գործողությանը: Այս մասին հայտարարել է Գերմանիայի ԱԳ նախարար Հայկո Մաասը, գրում է ՌԲԿ-ն՝ վկայակոչելով Sueddeutsche Zeitung պարբերականը:
«Մենք առավելագույն ճնշման ռազմավարությունը սխալ ենք համարում: Մենք չենք ցանկանում ռազմական էսկալացիա և հանդես կգանք դիվանագիտական քայլերի օգտին»,- ասել է Մաասը: Նրա խոսքով՝ Բեռլինն իր գործողությունները համաձայնեցնում է ֆրանսիացի գործընկերների հետ:
Պաշտպանության նախարար Աննեգրետ Կրամպ-Կարենբաուերն իր հերթին նշել է, որ Գերմանիան, ի տարբերություն ԱՄՆ-ի, շահագրգռված է Իրանի հետ միջուկային համաձայնագրի պահպանման հարցում:
Գերմանիայի նախարարների կաբինետի ներկայացուցիչ Ուլրիկե Դեմմերն էլ նշել է, որ Բեռլինը կարևոր է համարում շարունակել դիվանագիտական ուղին: «ԱՄՆ-ի ղեկավարությամբ առաքելությանը մասնակցությունը կարող է դժվարացնել այդ գործընթացը»,- հավելել է նա:
ԱՄՆ-ն արձագանքել է Գերմանիայի որոշմանը՝ քննադատելով Բեռլինի դիրքորոշումը: Գերմանիայում ԱՄՆ դեսպան Ռիչարդ Գրենելը հայտարարել է, որ Եվրամիության խոշորագույն տնտեսությունն ունեցող երկիրը պետք է ավելի շատ պատասխանատվություն ստանձնի միջազգային խնդիրների լուծման հարցում:
«Գերմանիան ԵՄ-ի խոշորագույն տնտեսական գերտերությունն է: Դա երկրի վրա գլոբալ պատասխանատվություն է դնում»,- ասել է ամերիկացի դիվանագետը:
