Գյումրիում տեղի ունեցած ԵԿՄ համաժողովի ընթացքում դժբախտ դեպք է եղել․ մահացել է վարչության աշխատակազմի ղեկավարը

Երեկ Գյումրիում անցկացվել է Երկրապահ կամավորական միության համաժողովը, որի ընթացքում դժբախտ դեպք է տեղի ունեցել. մահացել է ԵԿՄ վարչության աշխատակազմի ղեկավար Համբարձում Ասատրյանը։  Այս մասին Factor.am-ի հետ զրույցում ասաց ԵԿՄ Շիրակի մարզի խորհրդի նախագահ Յուրա Ալեքսանյանը։

«Ինչ տեղի ունեցավ,  պահի տակ եղավ։ Վատ էր զգում իրեն։ Ուզեցա շտապօգնություն կանչել, ասեց՝ չէ, լավ է, դեղը խմել եմ, նորմալ եմ։ Մի 5 րոպե հետո, բեմի հետնամաս ելավ, որ դուրս գար ու միանգամից դեպքը եղավ։  Ինձ թվում է, ինքը այդ պահին էլ մահացավ։ Հետո շտապօգնությունով տեղափոխեցինք հիվանդանոց՝ արդեն մահացած էր», – ասաց Յուրա Ալեքսանյանը՝ նշելով, որ առողջական խնդիրներ Համբարձում Ասատրյանն ունեցել է։

«Ինքը Երևանից վարչությունից եկել էր նախագահի ու փոխնախագահների հետ։  Երեկ այնքան է լավ եղել, որ մեքենայի ղեկին ինքն է նստած եղել։ Անգամ լրագրողներ են եղել իր հետ։ Ինքը նիստն էլ է վարել, համարյա վերջն էր, որ դեպքը եղավ»,- ասաց Յուրա Ալեքսանյանը։

ԵԿՄ Շիրակի մարզի խորհրդի նախագահի խոսքով՝ ԵԿՄ համաժողովներ մարզերում միշտ էլ անցկացվել են, երեկվա նիստն էլ բացառություն չի եղել։

«Համագումարից հետո վարչության նախագահի գլխավորությամբ փոխնախագահներով գնում են մարզեր՝ վերանշանակումներ կամ նշանակումներ անեն։ Տվյալ պաշտոնյային նշանակում են կամ ոչ։ Մեր դեպքում երեկ ինձ վերանշանակեցին։ 10 օրից էլ մենք բաժանմունքներում ենք անցկացնում նոր ընտրություններ։ Սա միշտ եղել է ու  կա, շատերը զարմացած հարցնում են՝ ոնց  է,  որ նիստը Գյումրիում են արել, բացատրում եմ, որ սա միշտ եղել է։ Համագումարից հետո մարզային խորհրդի նախագահները կամ մնում են, կամ փոխվում են»,- պարզաբանեց Յուրա Ալեքսանյանը։

Էմմա Չոբանյան