Քաղաքականություն
30.07.2019 | 18:00Factor.am–ի հարցազրույցը ՀՀ ԱԺ «Իմ քայլը» խմբակցության պատգամավոր, պետաիրավական հարցերի մշտական հանձնաժողովի անդամ Արուսյակ Ջուլհակյանի հետ
– Երկրորդ նախագահ Ռոբերտ Քոչարյանն այսօր տված հարցազրույցում ասել է, որ իշխանության հարցը կորոշվի փողոցում, արտահերթ խորհրդարանական ընտրությունների միջոցով։ Նաև պնդել է, որ կառավարման այս որակով այս իշխանությունը երկար չի դիմանա և վերընտրվելու հեռանկարներ չունի։ Ի՞նչ կասեք։
– Գնահատում եմ այն, որ Քոչարյանը կարողացել է ճիշտ գնահատել իրավիճակը և հասկացել է, որ քաղաքական ասպարեզում անելիք չունի և քաղաքական ճանապարհով որևէ բանի չի հասնի, ուստի որոշել է գնալ փողոցային պայքարի։ Եթե որևէ մեկն այս երկրում փողոցային պայքարի փորձ ունի, ապ դա մենք ենք։ Այդ փորձը ձևավորվել է հենց ամբաստանյալ Քոչարյանի կողմից իշխանության ուզուրպացման դեմ պայքարի ընթացքում, հետևաբար՝ կարող են փորձել, քանի որ Հայաստանում ժողովրդավարություն է տիրում մեկ տարուց ավելի, պաշտպանված է խաղաղ հավաքներ անցկացնելու իրավունքը, խոսքի ազատության իրավունքը, քանի որ ամբաստանյալ Քոչարյանը կարողանում է շատ ազատ արտահայտվել, իր բոլոր մեսիջները տեղ հասցնել այն դեպքում, երբ նրա իշխանավարման տարիներին ընդդիմախոսները ոչ միայն հնարավորություն չունեին, այլ նաև այդ հնարավորությունից օգտվելու՝ անգամ փորձերի ժամանակ խիստ ծանր և բիրտ ուժի միջոցով հակահարված էին ստանում։ Առաջարկում եմ պարոն Քոչարյանին շարունակել օգտվել իր խոսքի ազատության իրավունքից, իսկ եթե ցանկանում է փողոցային պայքար վարել, նաև իր՝ հավաքների խաղաղ, առանց զենքի ազատության իրավունքից:
– Իշխանությունը որևէ մտավախություն չունի՞:
– Իշխանությունը որևէ մտավախություն չունի, վայելում է ժողովրդի լայն զանգվածների վստահությունը։ Իշխանության հասել ենք ազատ, արդար և թափանցիկ ընտրությունների միջոցով, ստացել ենք ընտրողների ավելի քան 70 տոկոսի աջակցությունը։ Ինչ վերաբերում է պարոն Քոչարյանին, ապա ես պետք է նշեմ, որ անցած տարի, երբ հարյուր հազարավոր մարդիկ փողոց էին դուրս եկել, ոչ միայն Սերժ Սարգսյանի դեմ էին դուրս եկել, այլ նաև ամբողջ համակարգի, որի հիմնասյունն է եղել նաև Քոչարյանը: Ուստի այս պարագայում նա որևէ շանս չունի։
– Խոսելով նախկին իշխանությունների գործունեությունից՝ քաղհասարակության ներկայացուցիչները պահանջում են, որ ձեր թիմը քաղաքական գնահատական տա մինչ թավշյա հեղափոխությունն ընկած ժամանակահատվածում, իրենց ձևակերպմամբ՝ պետության զավթմանը։ Ձեր դիրքորոշումն ինչպիսի՞ն է:
– Մեր խմբակցության առանձին պատգամավորներ իրենց հարցազրույցներում հաճախ անդրադառնում են այդ հարցին՝ նշելով, որ այո՛, տեղի է ունեցել պետության զավթում: Ես հասկանում եմ, որ հասարակական կազմակերպություններն ակնկալում են ոչ թե առանձին պատգամավորների խոսքը, այլ Ազգային ժողովի՝ որպես ինստիտուտի։ Հենց այս հարցում է, որ մենք պետք է հասկանանք՝ ունե՞նք կոնսենսուս մյուս խմբակցությունների հետ։ Քաղաքական գնահատական տալու մասին քննարկումներ պարբերաբար ունենում ենք, ընդ որում՝ դրանք շատ ավելի վաղ են սկսել: Քննարկումների արդյունքում որոշում կկայացնենք և այդ մասին կտեղեկացնենք։ Իմ անձնական կարծիքն է, որ քաղաքական գնահատական պետք է տալ։
Հարցազրույցն ամբողջությամբ՝ տեսանյութում։
Շողիկ Գալստյան
