Հասարակություն
11.05.2017 | 15:33
Պետական եկամուտների կոմիտեի նախագահ Վարդան Հարությունյանն այսօր լրագրողների հետ հանդիպմանն անդրադառնալով Հայաստան ադրբեջանական խնձոր ներկրելու փասին՝ նշեց մեղավոր օղակների անունները:
«ԱԱԾ-ի և մեր կողմից կատարված միջոցառումների արդյունքում այդ դեպքը բացահայտվել է, բացահայտվել է, թե քանի աշխատակից են ներգրավված, գործն էլ գտնվում է Քննչական կոմիտեի վարույթում»,- ասաց Հարությունյանը` հավելելով, որ իր մեղքի բաժինն ունի ոչ միայն մաքսավորը, ով կաշառվելով թողել է, որ խնձորը մտնի հանրապետություն, այլև՝ խնձոր ներկրողը, նաև՝ այն խանութները, որոնք վաճառել են:
Իսկ դիտարկմանը, թե ինչպե՞ս ստացվեց, որ սահմանին ներկրվող «Իգլան» բացահայտվեց, իսկ խնձորները` ոչ, Վ. Հարությունյանը պատասխանեց. «Խնձորը չնկատվեց, որովհետև կաշառք են տվել»:
ՊԵԿ ղեկավարը նեղսրտելով լրագրողների կողմից կոնկրետ ադրբեջանական խնձորների թեմային այդքան ուշադրություն դարձնելու փաստից՝ ասաց. «Այդքան դրականի մեջ գտել եք մի սև կետ և ուզում եք սևացել»: Նա նաև հավելեց, թե լրագրողների կողմից ակնկալում էր կոչեր՝ բոյկոտելու այն խանութները, որոնք ադրբեջանական խնձոր են վաճառել:
