19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Մեկ աշխատակից ունեցող ՍՊԸ-ն Երևանի քաղաքապետարանին 24,7 մլն դրամի ծառայություն է մատուցել. կառույցները համագործակցում են Տարոն Մարգարյանի ժամանակներից
Տնտեսություն
25.07.2019 | 16:43
Հուլիսի 12-ին Ազգային ժողովի այգում տեղի ունեցած «Երևան» պատանեկան սիմֆոնիկ նվագախմբի 1 ժամ 10 րոպե տևողությամբ համերգի համար Երևանի համայնքային բյուջեից վճարվել է 24 միլիոն 750 հազար դրամ: Այս մասին Factor.am-ի գրավոր հարցմանն ի պատասխան փոխանցում են Երևանի քաղաքապետարանի տեղեկատվության և հասարակայնության հետ կապերի վարչությունից:
Ծառայությունները մատուցել է «Լայթ Լայֆ» սահմանափակ պատասխանատվությամբ ընկերությունը: Մատակարարը թեև ընտրվել է մրցութային կարգով, բայց քաղաքապետարանից փոխանցված տեղեկատվության համաձայն՝ հայտարարված մրցույթին միայն «Լայթ Լայֆ» ՍՊԸ-ն է մասնակցել: Իրավաբանական անձանց պետական ռեգիստրից տեղեկանում ենք, որ այս կազմակերպության միակ հիմնադիրը Արամ Թումանյանն է:
«Լայթ Լայֆ» ՍՊԸ-ն Երևանի քաղաքապետարանին հաճախակի է ծառայություններ մատուցում՝ սկսած Տարոն Մարգարյանի ժամանակներից: Մասնավորապես, գնումների համակարգի բաց աղբյուրներից Factor.am-ին հայտնի դարձավ, որ այս կազմակերպությունը 3 մլն 5 հազար դրամի շրջանակներում քաղաքապետարանին ծառայություններ է մատակարարել նախորդ տարվա մայիսին կնքված պայմանագրով՝ «Համով-հոտով Երևան» փառատոնի շրջանակներում:
«Լայթ Լայֆ» ՍՊԸ-ն Երևանի քաղաքապետարանին ևս մեկ ծառայություն է մատուցել 2018-ի ամռանը՝ «Երևան ՏԱՐԱԶ ֆեստ» միջոցառման շրջանակներում, որի արժեքը կազմել է 7 մլն դրամ:
Այս տարի «Լայթ Լայֆ» ՍՊԸ-ն 5 մլն դրամի ծառայություններ է մատուցել նաև Պաշտպանության նախարարությանը՝ 2019 թվականի մարտի 5-ին Վազգեն Սարգսյանի ծննդյան 60-ամյակի միջոցառման շրջանակներում:
Ի դեպ, այս ՍՊԸ-ն, որը միլիոնների ծառայություններ է մատուցում, ունի գրանցված ընդամենը մեկ աշխատակից: Այս մասին է վկայում Զինծառայողների ապահովագրության հիմնադրամին ընկերության կատարած փոխանցման չափը։ Այս տարվա մայիսին «Լայթ Լայֆ» ՍՊԸ-ն հիմնադրամին փոխանցել է ընդամենը 1000 դրամ, իսկ ապրիլին՝ 3000 դրամ: Հունիս և հուլիս ամիսներին վճարումներ չկան կատարված:
«Լայթ Լայֆ» ՍՊԸ-ի տնօրեն Արամ Թումանյանը Factor.am-ի հետ զրույցում անդրադառնալով հարցին՝ արդյոք ՍՊԸ-ն մեկ աշխատակից ունի, և, եթե այո, այդ մեկ աշխատակցով ինչպես են կարողանում միլիոնների ծառայություններ մատուցել, պատասխանեց. «Ներգրավում ենք պայմանագրային աշխատողների, քանի որ մեր աշխատանքը ստաբիլ չէ, ամռանն է ակտիվանում, դրա համար աշխատողներին ներգրավում ենք այս ամիսներին: Ես հիմա չգիտեմ, թե մեր ՍՊԸ-ում քանի հոգի է գրանցված, մի քանի հոգի պետք է լինի, չեմ կարող ստույգ թիվն ասել»:
Մեր հիշեցմանը, որ Զինծառայողների ապահովագրության հիմնադրամին մայիս ամսվա համար ընդամենը 1000 դրամ է փոխանցվել, Արամ Թումանյանը արձագանքեց. «Ուրեմն մեկ աշխատող ունենք, այս պահին միայն ես եմ»:
Նարեկ Կիրակոսյան
