Ռուսաստանի Խաբարովսկի երկրամասում լեռնադահուկային հանգստավայրում տեղակայված վրանային ճամբարում հրդեհի հետևանքով զոհերի թիվը 4-ի է հասել։ Բոլոր զոհերը երեխաներ են՝ 3 աղջիկ և 1 տղա: Այս մասին տեղեկանում ենք «Վեդոմոստի»-ից:
Աղջիկներից մեկը տեղում է մահացել, մյուս երեքը՝ ավելի ուշ՝ հիվանդանոցի վերակենդանացման բաժանմունքում։ Բացի այդ՝ 12 տուժած կա՝ 5 մեծահասակ և 7 երեխա:
Նշվում է, որ հրդեհի պահին ճամբարում 7-15 տարեկան 189 երեխա է եղել:
Ճամբարի ղեկավար Մաքսիմ Կուզնեցովը ձերբակալվել է։ Նրանից բացի՝ ձերբակալվել է նաև «Էքստրիմ Սերվիս» ԲԲԸ տնօրեն Վիտալի Բուրլակովը։ Վրանային ճամբարը վերջինի ընկերության սեփականությունն էր։
ՌԴ վարչապետ Դմիտրի Մեդվեդևը փոխվարչապետների հետ հանդիպման ժամանակ քննադատել է Խաբարովսկի ղեկավարին, որը հայտարարել է, թե վրանային ճամբարի գոյության մասին ոչ ոք տեղյակ չի եղել։
«Իսկ ո՞վ է պարտավոր իմանալ։ Սա ի՞նչ հայտարարություն է։ Եթե ոչ ոք այդ մասին չգիտեր, նշանակում է՝ նրանք վատ են կատարում իրենց պարտականությունները։ Իսկ եթե գիտեին, ինչո՞ւ են թույլատրել»,- ընդգծել է ՌԴ վարչապետը։
Դմիտրի Մեդվեդևը ՌԴ Կրթության և գիտության նախարարությանը, ինչպես նաև փոխվարչապետ Յուրի Տրուտնյովին հանձնարարել է հայտնաբերել Խաբարովսկում տեղի ունեցած ողբերգության պատճառները։
Նշվում է, որ վրանային ճամբարը մասնավոր է եղել, իսկ ստուգող հանձնաժողովներն այն բացելու թույլտվություն են տվել:
ՌԴ ՆԳՆ-ի տվյալներով՝ ճամբարի տարածքում 26 վրան է եղել, որից 20-ն ամբողջությամբ այրվել է:
Նելլի Մելքոնյան
