Գյումրիում տեղի ունեցած  նռնակի պայթյունից աղբատարի վարորդը կորցրել է ձեռքի մատները

Արդեն տեղեկացրել ենք, որ նախօրեին Գյումրիում տեղի է ունեցել նռնակի պայթյուն։ Ոստիկանության Կումայրիի բաժին հիվանդանոցից հաղորդում է ստացվել, որ «աջ դաստակի տարածում, պայթյունային վնասվածք, իրանի բազմաթիվ վերքեր» ախտորոշմամբ բուժօգնության է դիմել 44-ամյա մի տղամարդ։ Հիվանդանոց մեկնած օպերատիվ խմբի ծառայողներին տղամարդը հայտնել է, որ ժամը 23-ի սահմաններում իր վարած «ԿամԱԶ» բեռնատարով Կոշտոյան փողոցի աղբը հավաքելու ժամանակ, աղբամանի մոտ գտել է նռնակի պայթուցիչ։

Բեռնատարի վարորդը 44-ամյա Արմեն Խանոյանն է, որը 2014թ-ից  աշխատում է Գյումրու կոմունալ ծառայությությում՝  աղբատարի վարորդ՝, դեպքն էլ տեղի է ունեցել աշխատանքային պարտականությունները կատարելիս։

Factor.am-ի հետ զրույցում Գյումրու քաղաքապետարանի ենթակայության «Գյումրու կոմունալ ծառայություն» բյուջետային հիմնարկի տնօրեն Վարդգես Սամսոնյանը նշեց, որ դեպքը կարելի է անզգուշություն որակել, քանի որ վարորդը չի իմացել, որ նռնակ է։

«Դե չի գիտակցել, որ նռնակ է, միայն ձողն է եղել, որը ամեն մարդ չգիտի, որ կարող է պայթել։ Վերցրել է ձեռքի մեջ՝ չգիտակցելով, որ պայթուցիկ է, ձեռքի մեջ բացվել է։ Մանրամասներին չեմ տիրապետում, նախաքննությունը ցույց կտա։ Ձեռքի մեջ է պայթյունը տեղի ունեցել։  Վիրահատել են , երկու մատը հեռացրել են, հնարավոր չի եղել փրկել արդյունքում, հիմա իր վիճակը լավ է, բուժման ընթացքի մեջ է»,- ասաց Վարդգես Սամսոնյանը։

Նա նաեւ հավաստիացրեց, որ աղբատարի վարորդը գիշերային  ժամին աշխատել է  իր ցանկությամբ, քանի որ անձնական խնդիրների պատճառով ցերեկը չի կարողացել աշխատել։

«Ինքը շատ լավ աշխատող է, իր պարտականությունները նորմալ կատարող։ Ինքը մի 10 օր, 7 օր խնդրել էր՝ ընտանեկան հարցեր ուներ ցերեկը աշխատելու հետ կապված, անձնական խնդիրներով պայմանավորված, մենք օրենքով սահմանված կարգով հրաման ենք տվել, որ 20։00-ից մինչև ժամը 02։00 աշխատի»,- ասաց Վարդգես Սամսոնյանը։

Նշենք, որ դեպքի առիթով կատարվում է քննություն, հանգամանքները պարզվում են։

Էմմա Չոբանյան