Վանաձորում Մեծ հայրենականին նվիրված հուշարձանից քարեր են պոկվել. ԼՈՒՍԱՆԿԱՐՆԵՐ

Վանաձորում կանգնեցված Հայրենական մեծ պատերազմի հուշարձանն ու հարակից տարածքը ոչ այնքան բարվոք վիճակում են: Հուշարձանի պատերի որոշ հատվածներից քարեր են ընկել, անմար կրակի համար նախատեսված տարածքի քարերը կոտրված են, տարածքի որոշ հատվածի սալիկները՝ դուրս եկած:

«Շատ սարսափելի վիճակ էր, բոլոր տեղերը բաց էր, մարդիկ էլ բարձրանում ու լրիվ կեղտոտում էին: Մենք պատրաստվում ենք պատերազմի 75-ամյակին, այս ձևով ենք դիմավորելո՞ւ: Միջոցառման համար բավականին գումար է ծախսվում, բայց տարածքի վիճակն այսպիսին է»,- ասում են հարակից թաղամասի բնակիչները:

Մեծ հայրենականին նվիրված հուշարձանը հանրապետական նշանակության է, ներառված է Լոռու մարզի պատմության և մշակույթի հուշարձանների ցանկում: Վանաձորի գլխավոր ճարտարապետ Սուրեն Աբովյանն ասում է՝ տեղյակ են հուշարձանի խնդրի մասին, սակայն այս տարվա ծրագրերում տարածքի վերանորոգումը ներառված չէ:

«Դրա խնամքի, ամրակայման ու նորոգման պարտականությունը հավասարապես դրված է և՛ պետության, և՛ համայնքի վրա: Այս տարի նախատեսված որևէ ծրագիր չկա, սակայն հաջորդ տարի, ուսումնասիրություններից հետո, ըստ ֆինանսական հնարավորությունների՝ որոշակի աշխատանքներ կարվեն: Սուբվենցիոն ծրագրերով բյուջեն բավականին ծանրաբեռնվեց և, այսպես ասած, մեր ծախսերի սահմանագծին ենք հասել: Այդ պատճառով այս պահին հնարավորություն չկա»,- ասաց Սուրեն Աբովյանը:

Տեսնելով, որ պետական մարմինների կողմից աշխատանքներ չեն տարվում, բնակիչներն իրենք են ձեռնամուխ եղել տարածքը բարեկարգելու աշխատանքին: Վերջերս երիտասարդները մաքրել են հուշարձանի տարածքը, փոքր-ինչ բարեկարգել, իսկ կոտրված քարերը շարունակում են շարված մնալ հուշարձանի պատի տակ՝ մինչև դրանք վերականգնելու համար համապատասխան դրամական միջոցներ կլինեն:

Տաթևիկ Ղազարյան