Քաղաքականություն
18.07.2019 | 21:15Factor.am-ի զրուցակիցն է ԱԺ «Իմ քայլը» խմբակցության պատգամավոր Հովիկ Աղազարյանը։
– Պարո՛ն Աղազարյան, Իջևանում ստեղծված իրավիճակին ի՞նչ գնահատական կտաք։
– Իջևանում առկա իրավիճակը հետևանքն է մեկ տարի վարած քաղաքականության, որի նպատակն է եղել չեզոքացնել բոլոր ապօրինի ծառահատումները, որպեսզի չկորցնենք մեր ազգային հարստությունը։ Այս մեկ տարվա ընթացքում ստվերում գտնվող շատ մարդիկ զգացին՝ կորցնում են աստղաբաշխական գումարներ աշխատելու հնարավորությունը։ Այդ հանգամանքով պայմանավորված՝ մեր հայրենակիցներից որոշների դուրս բերեցին փողոց՝ շահարկելով այն փաստը, որ կզրկվեն աշխատանքից։ Բայց ես համոզված եմ, որ մեր քաղաքացիները ոչ միայն չեն զրկվի իրենց եկամուտներից, այլ նույնիսկ նրանց եկամուտները կարող են ավելանալ:
– Ինչպե՞ս։
– Եթե ամեն ինչ տեղի ունենա օրինականության դաշտում, ապա այդ հնարավորությունը կլինի:
– Ինչպե՞ս եք պատկերացնում ստեղծված իրավիճակի հանգուցալուծումը։
– Անտառ չպետք է կտրել, ո՞նց կարելի է անտառը վայրենու նման կտրել, ինչ է՝ ես պետք է հաց ուտեմ: Հաց ուտելու այլ տարբերակ պետք է գտնենք, իսկ այդ տարբերակը կա: Բայց, նորից եմ կրկնում, խնդիրն այս դեպքում հացին էլ չի վերաբերում։
– Անդրադառնանք նաև վարչապետ Նիկոլ Փաշինյանի՝ երեկ տված հարցազրույցին, հայտարարեց, որ Սահմանադրական դատարանը «բուդկայի» նման սեփականաշնորհել են։ Իշխանությունը սահմանադրական փոփոխությունները որպես ստեղծված իրավիճակից ելք դիտարկո՞ւմ է:
– Սահմանադրական դատարանի շուրջ ստեղծված իրավիճակը ես քաղաքական եմ համարում, որովհետև Հրայր Թովմասյանն ու ՍԴ ևս մի քանի անդամներ հին քաղաքական թիմից են: Երբ ժողովուրդը մերժեց Սերժ Սարգսյանին, չէր մերժում անձին, ինքը մերժում էր թիմին: Հրայր Թովմասյանն էլ այդ իշխանության անդամ է, շատ հարցերի ճարտարապետը: Ինքը պետք է հրաժարական տա: Չի տալիս՝ այլ ճանապարհներ կան:
– Ի՞նչ ճանապարհներ:
– Երեք-չորս ամսվա ընթացքում սահմանադրական փոփոխություններ անել, որի արդյունքում Հրայր Թովմասյանն այլևս այդ դիրքում չի լինի։ Սահմանադրական դատարանի փոխարեն այդ գործառույթներով մեկ այլ ինստիտուտ կարող ենք ստեղծել՝ նույն գործառույթներով:
Հարցազրույցն ամբողջությամբ՝ տեսանյութում:
Շողիկ Գալստյան
