16.12.2025 | 12:03
37-ամյա տղամարդը դանակահարել է հորն ու մորը․ ծնողները մահացել են, որդին ձերբակալվել է
Եվպատորիայի հայկական եկեղեցին հավատացյալներին է փոխանցվել
Մշակույթ
16.07.2019 | 13:58
Եվպատորիայի հայկական եկեղեցին անհատույց օգտագործման իրավունքով փոխանցվել է տեղի «Սուրբ Նիկողայոս եկեղեցի» կրոնական կազմակերպությանը: Այս մասին գրում է RG.ru-ն:
Աղբյուրի փոխանցմամբ՝ Հայ առաքելական եկեղեցու նախկին եկեղեցական կառույցների և գույքի ճակատագիրը քննարկվում էր 2014 թվականից, երբ Ղրիմն անցավ Ռուսաստանին: Թերակղզի այցելած ՀԱԵ Ռուսաստանի և Նոր Նախիջևանի թեմի առաջոնորդ Եզրաս արքեպիսկոպոսը Ղրիմի ղեկավար Սերգեյ Ակսյոնովի հետ համաձայնություն էր ձեռք բերել անշարժ գույքի վերադարձի հարցով: Հինգ տարի անց եկեղեցու և եկեղեցական դպրոցի շենքերը փոխանցվել են հայկական եկեղեցուն՝ 100 տարի ժամկետով անհատույց օգտագործման:
«Սա վաղուց սպասված որոշում էր: Հիմա, իրավաբանական հարցերի լուծումից հետո, պետք է կարգի բերենք մեզ փոխանցված շենքերը: Այնտեղ չկան ջուր և էլեկտրաէներգիա, իսկ եկեղեցական դպրոցի շենքի կեսը նորոգված չէ»,- RG-ին ասել է Սուրբ Նիկողայոս եկեղեցու հոգևոր հովիվ հայր Անանինան:
Նրա խոսքով՝ ցանկանում են, որպեսզի այստեղ արագորեն սկսի գործել կրթամշակութային կենտրոնը, քանի որ ներկայում երեխաները ստիպված են քաղաքի տարբեր դպրոցներում ուսանել:
Հայր Անանիան վստահեցրել է, որ կրոնական համայնքը մտադիր է բարիդրացիական հարաբերություններ պահպանել տարեցների ինտերնատի հետ, և եկեղեցու դռները միշտ բաց կլինեն ինտերնատի բնակիչների համար:
Սուրբ Նիկողայոս եկեղեցին կառուցվել է 19-րդ դարի 30-40-ական թվականներին: Խորհրդային տարիներին եկեղեցին փակվել է, զանգակատունն ու գմբեթները՝ քանդվել: Երկրորդ աշխարհամարտից հետո տաճարը որպես պահեստ է օգտագործվել, իսկ հետո տարեցների ինտերնատի է վերածվել:
