Վարչապետի հանձնարարականը՝ շինաշխատանքների վերաբերյալ

ՀՀ Կառավարության այսօրվա  նիստն էլ, ինչպես միշտ, մեկնարկեց վարչապետ Կարեն Կարապետյանի հանձնարարականներով: Կառավարության ղեկավարն անդրադարձավ շինաշխատանքների ընթացքին:

«ՏԻՄ-ը հաշվի առնելով եղանակային պայմանները որոշում է շինարարական աշխատանքների թույլտվության տրամադրման կամ մերժման հարցը: Արդյունքում, հատկապես հանրային ծառայության ոլորտի կազմակերպությունները, չնայած շինարարական աշխատանքները կատարելու անհրաժեշտությանը ձմեռային պայմաններում զրկված են լինում աշխատանքները կատարելու հնարավորությունից, քանի որ վերջիններիս, որպես կանոն, չի տրամադրվում համապատասխան թույլտվություն»,- ասաց Կարապետյանը:

Գործադիրի ղեկավարը մանրամասնեց՝ ստեղծված իրավիճակը հիմնականում պայմանավորված է շինարարական աշխատանքների՝ ըստ եղանակային պայմանների ներկայացվող նորմատիվային պահանջների և հստակ պայմանների բացակայությամբ, ինչպես նաև համապատասխան թույլտվության տրամադրման լայն հայեցողական լիազորությամբ:

Ելնելով վերոնշյալից՝ Կարեն Կարապետյանը քաղաքաշինության պետական կոմիտեի նախագահին հանձնարարեց 40 օրվա ընթացքում մշակել և հաստատել շինարարական աշխատանքները ըստ եղանակային պայմանների կազմակերպելու, դրանց ներկայացվող պահանջների ապահովման վերաբերյալ իրավական ակտի նախագիծ:

Բացի այդ, հանձնարարեց Տարածքային կառավարման և զարգացման նախարարին ուսումնասիրել և ներկայացնել իրավական ակտ, ՏԻՄ-ի կողմից թույլտվությունների ներկայացման հայեցողական լիազորությունների սահմանափակման և գործնականում բացառապես եղանակային պայմաններից ելնելով մերժման դեպքերը բացառելու նպատակով:

Վարչապետը տեղեկացրեց, որ հանդիպել են ենթակառուցվածքների ղեկավարների հետ, ովքեր հայտնել են, թե ձմեռը թույլտվություն չի տրամադրվում և ցուցանիշները նվազում են: Ըստ վարչապետի՝ կա «ստերեոտիպ», որ ձմռանը շինարարություն անել չի կարելի: Հանձնարարեց  ուսումնասիրել հյուսիսային երկրների փորձը և շինարարության տեմպը ավելացնել:

 Շողիկ Գալստյան