Վլադիմիր Պուտինը դեմ է Վրաստանի նկատմամբ պատժամիջոցներ սահմանելուն

ՌԴ նախագահ Վլադիմիր Պուտինը դեմ է արտահայտվել Վրաստանի նկատմամբ պատժամիջոցներ սահմանելուն:

«Ես դա չէի անի՝ վրաց ժողովրդի հանդեպ հարգանքից ելնելով»,- լրագրողներին ասել է Պուտինը, գրում է ՌԻԱ Նովոստին:

Նշենք, որ պատժամիջոցներ սահմանելու նախաձեռնությամբ հանդես էր եկել ՌԴ Պետդուման: Պուտինի հայտարարությունից հետո այնտեղ նշել են, որ առայժմ չեն ծրագրում հետ կանչել պատժամիջոցների մասին դիմումը: Նախարարների կաբինետում էլ նշել են, որ ծանոթ են փաստաթղթին, բայց ուշադրություն են հրավիրում Վլադիմիր Պուտինի կարծիքի ուղղությամբ:

ՌԴ նախագահը նաև մեկնաբանել է իրեն վիրավորած վրացի լրագրողի դեմ գործ հարուցելու գաղափարը՝ հայտարարելով. «Մեծ պատիվ կլինի քրեական գործեր հարուցելը: Թող շարունակի հեռարձակել»:

Հիշեցնենք, որ կիրակի երեկոյան վրացական «Ռուսթավի 2» հեռուստաալիքի հաղորդավար Գեորգի Գաբունիան իր «P.S.» հեղինակային հաղորդումը սկսել էր ՌԴ նախագահ Վլադիմիր Պուտինի հասցեին հայհոյանքով: Վրաստանում սոցցանցերի բազմաթիվ օգտատերեր մտավախություն են հայտնել, որ սա կարող է է՛լ ավելի սրել վրաց-ռուսական հարաբերությունները: Գաբունիայի պահվածքը դատապարտել են Վրաստանի նախագահն ու վարչապետը, իսկ ԱԳՆ-ն սա որակել է երկու երկրների հարաբերություններում լարվածություն մտցնելու փորձ:

Գեորգի Գաբունիայի ելույթը դատապարտել են նաև Ռուսաստանում: Այդ երկրի ԱԳՆ-ն հայտարարել է, որ մասնագիտական կազմակերպությունների և լրագրողական հանրության համարժեք արձագանքն է ակնկալում:

Բացի այդ, ավելի քան տասը օր Վրաստանում հակառուսական և հակակառավարական բողոքի ակցիաներ են ընթանում, ինչը հանգեցրել է ՌԴ-ի և Վրաստանի միջև ավիահաղորդակցության դադարեցման: