02.03.2026 | 13:33
Հայ-իրանական սահմանին առանձնահատուկ շարժ չկա. Արմեն Ղազարյան․ ՏԵՍԱՆՅՈՒԹ
Վրաստանի դեմ պատժամիջոցների հարցով որոշում առայժմ չկա. Դմիտրի Պեսկով
Քաղաքականություն
09.07.2019 | 16:47
ՌԴ Պետդուման միասնականություն է դրսևորել՝ հանդես գալով Վրաստանի դեմ պատժամիջոցներ սահմանելու նախաձեռնությամբ, սակայն որոշումը կայացնում են նախարարների կաբինետն ու նախագահը: Այս մասին ասել է ՌԴ նախագահի խոսնակ Դմիտրի Պեսկովը՝ հավելելով, որ նման որոշում առայժմ չի կայացվել, գրում է ՌԻԱ Նովոստին:
Պետդուման այսօրվա լիագումար նիստում հայտարարություն է ընդունել, որում ՌԴ կառավարությանը խորհուրդ է տվել դիտարկել Վրաստանի նկատմամբ հատուկ տնտեսական միջոցներ կիրառելու նպատակահարմարությունը և համապատասխան առաջարկներ ներկայացնել նախագահին:
«Դուք տեսնում եք, թե ինչպիսի կոշտ արձագանք կա ռուսաստանցի խորհրդարանականների կողմից վրաց հաղորդավարի աննախադեպ պահվածքի ֆոնին: Սակայն որոշումը, ինչպես գիտեք, կայացվում է կառավարության և, վերջնարդյունքում, նախագահի կողմից: Առայժմ որոշում չի կայացվել: Մենք անմիջապես կտեղեկացնենք»,- ասել է Դմիտրի Պեսկովը՝ պատասխանելով հնարավոր պատժամիջոցների առնչությամբ Կրեմլի դիրքորոշման մասին հարցին:
Հիշեցնենք, որ կիրակի երեկոյան վրացական «Ռուսթավի 2» հեռուստաալիքի հաղորդավար Գեորգի Գաբունիան իր «P.S.» հեղինակային հաղորդումը սկսել էր ՌԴ նախագահ Վլադիմիր Պուտինի հասցեին հայհոյանքով: Վրաստանում սոցցանցերի բազմաթիվ օգտատերեր մտավախություն են հայտնել, որ սա կարող է է՛լ ավելի սրել վրաց-ռուսական հարաբերությունները: Գաբունիայի պահվածքը դատապարտել են Վրաստանի նախագահն ու վարչապետը, իսկ ԱԳՆ-ն սա որակել է երկու երկրների հարաբերություններում լարվածություն մտցնելու փորձ:
Գեորգի Գաբունիայի ելույթը դատապարտել են նաև Ռուսաստանում: Այդ երկրի ԱԳՆ-ն հայտարարել է, որ մասնագիտական կազմակերպությունների և լրագրողական հանրության համարժեք արձագանքն է ակնկալում:
